ԵՐԵՎԱՆ, 23 հոկտեմբերի./Նովոստի-Արմենիա/.Ոչ նյութական հայկական ժառանգությունը և նրա ողջ արժեքային համակարգը իրավական և գերատեսչական պաշտպանության կարիքն ունի։ Այս մասին երեքշաբթի «Ավանդական բանավոր ժառանգություն, ոչ նյութական մշակույթ» գիտա-կիրառական խորհրդաժողովում հայտարարեց Հայաստանի մշակույթի նախարարության պետական ծրագրերի բաժնի վարիչ Գառնիկ Գույումջյանը։
«Հոգևոր ժառանգության պահպանությունը ենթադրում է մի շարք միջոցների իրագործում, որոնք թույլ կտային ապահովել նրա կենսունակությունը, ներառյալ փաստագրումը, հետազոտումը, պահպանումը, տարածումը, փոխանցումը և վերածնունդը»,-նշեց Գույումջյանը։
Նրա խոսքերով, հենց այդ նպատակով այս տարվա հունիսին Հայաստանի մշակույթի նախարարության նախաձեռնությամբ Հայաստանում «Ոչ նյութական մշակութային ժառանգության մասին» օրինագծի նախապատրաստման հանձնաժողով է ստեղծվել։
«Հանձնաժողովն աշխատանքներն ավարտել է սեպտեմբերին, և արդեն հոկտեմբերի վերջին օրինագիծը կներկայացվի Հայաստանի կառավարոևւթյան հաստատմանը, ինչից հետո կմտցվի Ազգային ժողովի նիստի օրակարգ»,-ասաց Գույումջյանը։
Նրա խոսքերով, օրինագծով նախատեսվում է ոչ նյութական ժառանգության միասնական պետական քաղաքականության սահմանում, օրենքի իրագործման գործում պետական գերատեսչությունների դերի ու նշանակության ճշգրտում՝ միջազգային պայմանավորվածությունների հիման վրա թույլ տալով իրականացնել նաև Հայաստանից դուրս գտնվող մշակութային ժառանգության պահպանում։
«Ապագա օրենքը թույլ կտա լուծել ազգային ավանդական ժառանգության պահպանության և փոխանցման, բանավոր ավանդության ուսումնասիրման, ինչպես նաև ավանդականը նորի հետ համադրելու նոր ուղիների փնտրտուքի հետ կապված լուրջ խնդիրներ՝ դրանով իսկ պահպանելով մեր անգին ժառանգությունը»,-ընգծեց Գույումջյանը
Իր հերթին Հայաստանում Ռուսաստանի դեսպանատան խորհրդական, Ռուսաստանի ԱԳՆ-ին կից Միջազգային գիտական և մշակութային համագործակցության ռուսաստանյան կենտրոնի հայկական ներկայացուցչության ղեկավար Անատոլի Նիկոլաևն ընգծեց, որ հետխորհրդային տարածքում Հայաստանն առաջինն է նախաձեռնում նման օրինագիծ։
Նրա խոսքերով, պետական աջակցությունը և ոլորտի իրավական կարգավորումը թույլ կտան պահպանել և բազմապատկել հայ ժողովրդի հարուստ ոչ նյութական ժառանգությունը։ –0—
