«Թեքեյան» հայկական մշակութային միությունը հոկտեմբերին նշում է 60-ամյակը

«Թեքեյան» հայկական մշակութային միությունը 2007-ի հոկտեմբերին նշում է իր գործունեության 60-ամյակը։ Այս մասին երեքշաբթի Երևանում տեղի ունեցած մամուլի ասուլիսում հայտարարեց ԱՄՆ-ում և Կանադայում «Թեքեյան» միության ղեկավար Հարություն Արզումանյանը։

«Մեր հոբելյանի կապակցությամբ մենք պատրաստվում ենք ընդլայնել մեր կրթա-մշակութային ծրագրերը, մասնավորապես, ծրագրում ենք թերթի լույս ընծայում, մի շարք գրքերի հրատարակում»,-ասաց Արզումանյանը։

Նրա խոսքերով, Միության գործունեության հիմնական նպատակը սփյուռքում հայ ժողովրդի մշակութային ժառանգության պահպանումն է։

«Մենք փորձում ենք պահպանել Հայաստանի և սփյուռքի միջև կապը, քանի որ օտարության մեջ մարդիկ արագ են ձուլվում»,-նշեց Արզումանյանը։

«Թեքեյան» հայկական մշակութային միությունը հիմնվել է 1947-ին Բեյրութում, ներկայումս գործում է գրեթե 50 երկրներում։

Հայաստանում «Թեքեյան» միությունը հաստատել է ամենամյա մրցանակներ, մասնավորապես, գրականության, լրագրության, երաժշտության ոլորտներում։ Միության կողմից 7 տարիների ընթացքում Հայաստանում իրականացված ծրագրերի ընդհանուր գումարը կազմում է 250 հազ. ԱՄՆ դոլար։—0--