ԵՐԵՎԱՆ, 7 օգոստոսի./Նովոստի-Արմենիա/. Երեքշաբթի Հայաստանի ազգային գրադարանում տեղի ունեցավ պատմական գիտությունների թեկնածու Տիգրան Սահակյանի «Ցավալի պայմանագրեր» գրքի շնորհանդեսը։
Ինչպես միջոցառման ժամանակ հայտարարեց գրքի հեղինակը, հրատարակության մեջ ուսումնասիրվել է 1914-1923թթ. ժամանակաշրջանը, այսինքն՝ Առաջին համաշխարհային պատերազմի և դրան հաջորդող տարիների ժամանակաշրջանը՝ «Հայաստանի համար անբարենպաստ բոլոր հետևանքներով հանդերձ»։
«Աշխատության մեջ մանրամասն ուսումնասիրվել են Բրեստ-լիտվական, Բաթումի, Սևրի, Երևանի, Ալեքսանդրապոլի, Մոսկվայի, Կարսի և Լոզանի պայմանագրերը, ինչպես նաև դրանց հիմքում դրված, «Հայկական հարցի» հետ անմիջական կապ ունեցող, պատմական դեպքերը»,- նշեց Սահակյանը։
Ազգային գրադարանի տնօրեն Դավիթ Սարգսյանի կարծիքով, հրատարակությունը մեծ ավանդ է հայրենական պատմագրության մեջ, քանի որ այստեղ առաջին անգամ մանրամասնորեն ուսումնասիրվում են ութ այսպես կոչված «ցավալի պայմանագրերը», որոնք էական նշանակություն են ունեցել Հայաստանի պատմության համար։
Նրա խոսքերով, այս աշխատությունը լուրջ պատմա-գիտական հետազոտություն է, որը մեծ արժեք է ներկայացնում ինչպես գիտնականների, այնպես էլ միջազգային իրավունքի մասնագետների համար։
«Տեքստը գրված է պարզ, մատչելի լեզվով և հենց այդ պատճառով էլ մեծ նվեր է ոչ միայն գիտական ասպարեզի ներկայացուցիչների, այլև ողջ հասարակության համար»,- ավելացրեց գրադարանի տնօրենը։
Սարգսյանը վստահություն հայտնեց, որ «Ցավալի պայմանագրեր» գիրքն անհրաժեշտ է թարգմանել օտար լեզուներով, որպեսզի այն հասանելի լինի նաև արտասահմանցի ընթերցողին։
«Ցավալի պայմանագրեր» գիրքը հարկավոր է թարգմանել աշխարհի տարբեր լեզուներով, քանի որ այն հետաքրքրություն է ներկայացնում նաև այն օտարերկրյա քաղաքացիների համար, որոնք գոնե մի քիչ ծանոթ են Հայաստանի պատմությանը»,- կարծում է Սարգսյանը։ --0—
