Շառլ Ազնավուրի կյանքի կանոնները (ՏԵՍԱՆՅՈՒԹ)

ԵՐԵՎԱՆ, 4 ապրիլի. /Նովոստի-Արմենիա/. Աշխարհահռչակ շանսոնիե Շառլ Ազնավուրը Մոսկվայում կայանալիք համերգի նախաշեմին պատմել է Հայաստանում խորհրդարանական ընտրությունների նկատմամբ իր վերաբերմունքի, իր հորից իրեն մնացած ժառանգության և այն մասին, թե ինչպես է երգերի սյուժեներ գտնում։

Ես երբեք չեմ խոսում քաղաքականության մասին։ Բայց միևնույն ժամանակ ունեմ քաղաքական գործիչ ընկերներ, որոնց հետ զրուցում ենք արվեստի մասին։ Եվ ում էլ որ ընտրի իմ ժողովուրդը, ես ընդունում եմ այդ ընտրությունը։ Ես չեմ զբաղվում քաղաքականությամբ, բայց հարգում եմ իմ ժողովրդի ընտրությունը։ Չեմ սիրում մարդկանց, ովքեր մեկնում են այլ երկրներ և քննադատում իրենց երկրի քաղաքականությունը։ Ինձ համար ամեն ինչ գերազանց է։

Իմ լեզուն հայերենն է, բայց աշխատանքային լեզուն ֆրանսերենն է։ Այդ պատճառով էլ ինձ անվանում են ֆրանսիացի երգիչ, թեև բոլորը գիտեն, որ ես հայ եմ։

Ես սիրում եմ իմ աշխատանքը և ունկնդիրներին։ Դա գլխավորն է արտիստի համար։ Եթե նույնիսկ մի փոքր հոգնում եմ, դա ինձ չի կանգնեցնում։ Ես պետք է բեմ բարձրանամ։ Իմ ունկնդիրը շնորհակալ է և հավատարիմ, նա ինձ հարստացնում է, ստիպում գնալ առաջ և կատարելագործվել։ Հենց այդ հանդիսատեսն է երկարացնում երիտասարդությունը։

Իմ գաղտնիքն խանդավառությունն է և աշխատանքը։ Ես ինձ մոտ միշտ ունեմ փոքր, բայց շատ ծանր ճամպրուկ, որում կա աշխատանքի համար անհրաժեշտ ամեն ինչ։ Եվ երվեք չի եղել կարիերայում վերջակետ դնելու ցանկություն։ Եթե կանգ առնեմ` կմահանամ։

«Երկու կիթառ» երգը (երգչի երգացանկի ամենահայտնի երգերից մեկը` խմբ.) իմ հոր երգացանկի մասն էր, քանի որ նա կատարում էր ոչ միայն հայտնի հայ կատարողների ստեղծագործություններ, այլ նաև ռուսերեն լեզվով երգեր։ Այդ երգում ես կրկներգը ռուսերեն, որովհետև այն հնարավոր չէ թարգմանել։ Ինձ վրա մեծ ազդեցություն է թողել հայկական պոեզիան, ռուսական, ամերկյան և իտալական մշակույթը։

Գրել եմ 1400 երգ։ Ես ամեն օր մեկական երգ եմ գրում։ Բայց նաև ոչնչացնում եմ նախօրեին գրածից որոշ հատված։ Սկզբում թվում է, թե ամեն ինչ գերազանց է, բայց ավելի ուշ թերություններ եմ գտնում։ Այդպիսով, ես ինքս իմ թիվ մեկ քննադատն եմ։

Ես փորձում եմ խոսել բոլոր նրանց մասին, ովքեր դժվար կացության մեջ են, որ աջակցությունս հայտնեմ նրանց։ Բարդ է գտնել մի սյուժե, որի մասին դեռ չի ասվել, բայց ես պրպտում եմ։ Հաճախ սյուժեներն իրենք են գալիս։ Այդպես եմ գրել Հայոց ցեղասպանությանը նվիրված «Նրանք ընկան» («Ils sont tombés») երգը։ -0-