Ազգային ակադեմիան «Օսկարի» հայկական առաջին անալոգի մրցույթ է հայտարարում

ԵՐԵՎԱՆ, 27 հոկտեմբերի. /Նովոստի–Արմենիա/. Հայկական ազգային կինոակադեմիան հայտարարում է «Անահիտ» առաջին հայկական մրցանակաբաշխության մասնակցության մրցույթ, հայտնում է Ակադեմիայի մամուլի ծառայությունը։

Հայկական ժամանակակից կինոյի պատմության մեջ իրենց ավանդն ունեցող Հայկական ազգային կինոակադեմիայի 30-ից ավելի անդամների որոշմամբ մրցանականեր կհանձնվեն հետևյալ անվանակարգերում՝
1. Լավագույն խաղարկային ֆիլմ
2. Լավագույն վավերագրական ֆիլմ
3. Լավագույն կարճամետրաժ ֆիլմ
4. Լավագույն անիմացիոն ֆիլմ
5. Լավագույն ռեժիսոր
6. Լավագույն օպերատոր
7. Լավագույն սցենարիստ
8. Լավագույն դերասան
9. Լավագույն դերասանուհի
10. Լավագույն նկարիչ
11. Լավագույն կոմպոզիտոր

«Անահիտ» մրցանակաբաշխության նպատակն է վերաձևակերպել հայկական ժամանակակից կինոյի գնահատման չափանիշները, նպաստել նոր անունների բացահայտմանն ու լավագույնը ճանաչված ֆիլմերի տարածմանը:


Մրցանակաբաշխությանը մասնակցելու հայտերի ընդունումը կսկսվի հոկտեմբերի 26-ից և կշարունակվի մեկ ամիս: Մրցանակաբաշխությանը կարող են ներկայացվել 2015թ. նոյեմբերից մինչև 2016թ-ի հոկտեմբերն արտադրված այն ֆիլմերը, որոնք հանդիսանում են ՀՀ պետական կամ մասնավոր ստուդիաների արտադրանք կամ այն համատեղ արտադրությունները, որոնք հայկական կողմից ունեն 20 տոկոսից ավելի ֆինանսական մասնակցություն, և որոնց ստեղծագործական հիմնական կազմի ներկայացուցիչների մեծամասնությունը ՀՀ քաղաքացիներ են:

Մրցանակաբաշխությանը մասնակցելու հայտ կարող է ներկայացնել միմիայն ֆիլմի իրավատերը:

Մանրամասներին կարելի է ծանոթանալ հետևյալ հղումով։ -0-