Այվազովսկու կտավները «կերգեն» Ջիվան Գասպարյանի դուդուկի ելևէջներով

ԵՐԵՎԱՆ, 30 մարտի. /Նովոստի-Արմենիա/. «Հնչող կտավներ» բացառիկ նախագծի գլխավոր համերգը կկայանա Մոսկվայում Կրեմլի պետական պալատի փոքր դահլիճի բեմում ապրիլի 2–ին, հայտնում է Կրեմլի պալատի պաշտոնական կայքը։

Երեկոյի գլխավոր աստղը համաշխարհային երաժիշտ, դուդուկի վարպետ Ջիվան Գասպարյանն է։ «Դուդուկը հնարավորություն կընձեռի նորը տեսնել Հովհաննես Այվազովսկու կտավներում։ Ռուսաստանի գլխավոր բեմում առաջին անգամ հանդիսատեսին կներկայացվի նաև բացառիկ տրիո, որում կմիաձուլվեն դուդուկի, երգեհոնի և սաքսոֆոնի ձայները»,– ասվում է հաղորդման մեջ։

Համերգի կազմակերպիչ, «Բելկանտո» հիմնադրամի գեղարվեստական ղեկավար Տատյանա Լանսկայայի խոսքով, «համերգի հոգին դուդուկն է։ Այն երգում է Ջիվան Գասպարյանի շնորհիվ։ Դուդուկը կարծես խոսում է ունկնդրի հետ, քեզ կարծես տանում է ինչ–որ ալիքով։ Դուդուկի հենց այդ հատկանիշն է օգնել մեզ ընտրել գործիքն Այվազովսկու կտավների հնչունավորման համար։ Իսկ միասին դուդուկը և երգեհոնը կներկայացնեն Այվազովսկու կտավների բյուրեղապակյա ազատությունը»,– ասել է Լանսկայան։ -0-