Ավիշայ Քոենը համերգով ելույթ կունենա Հայաստանում

ԵՐԵՎԱՆ, 22 մայիսի. /Նովոստի–Արմենիա/. Իսրայելցի կոնտրաբասահար, կոմպոզիտոր, երգիչ և գործիքավորող Ավիշայ Քոենն իր տրիոյով առաջին անգամ համերգով ելույթ կունենա Երևանում։

Ինչպես «Նովոստի–Արմենիա» գործակալությանը հայտնեցին կազմակերպիչները, համերգը կկայանա մայիսի 31–ին Արամ Խաչատրյան համերգասրահում։

Տրիոյի կազմում, բացի Ավիշայ Քոենից (կոնտրաբաս և վոկալ), հանդես են գալիս ամենապրոֆեսիոնալ երաժիշտները`Իտամար Դոարին (հարվածային գործիքներ) և Օմրի Մոռը (դաշնամուր):

Համերգի նախաձեռնողներն են` Prime Production-ը և Արդշինբանկը: Համերգի իրականացմանն աջակցում են Հայաստանում Իսրայելի պատվո հյուպատոսությունը, Ջազի հայկական ասոցիացիան և «Մուրան» ընկերությունը:

Քոենը ծնվել է 1970 թվականին Երուսաղեմում։ Շատ վաղ տարիքից սկսել է դաշնամուր նվագել: Երբ երաժիշտը 14 տարեկան էր, ծնողները տեղափոխվում են Սենտ-Լուիս, որտեղ էլ նա սիրահարվում է ջազին:

Իսրայելական բանակում ծառայելուց հետո Քոենը որոշել է սովորել կոնտրաբաս նվագել սովորել: 1992-ին Ավիշայը տեղափոխվում է Նյու Յորք:

2003 թվականից սկսել է զբաղվել սոլո կարիերայով: «Բեմն այն վայրն է, որտեղ Քոենն իրեն տանն է զգում»,- երաժշտի մասին ասում են քննադատները, ովքեր շատ բարձր են գնահատում Քոենի և նրա տրիոյի ելույթները: -0-