ԵՐԵՎԱՆ, 10 մայիսի. /Նովոստի–Արմենիա/. Հենրիկ և Գերոնտի Թալալյանների անվան ալտահարների և թավջութակահարների ամենամյա 7–րդ հանրապետական փառատոնը կանցկացվի Հայաստանում մայիսի 18–ից հուլիսի 5–ը, «Նովոստի–Արմենիա» գործակալությանը հայտնեցին միջոցառման կազմակերպիչները։
Փառատոնը նվիրված է հանրաճանաչ կոմպոզիտորների հոբելյանին` Առնո Բաբաջանյանի և Էդվարդ Միրզոյանի 95-ամյակին, Գերոնտի Թալալյանի 90-ամյակին, Միքայել Կոկժաևի 70-ամյակին, Դմիտրի Շոստակովիչի 110-ամյակին, Բելա Բարտոկի 135-ամյակին, Վոլֆգանգ Ամադեուս Մոցարտի 260-ամյակին, ինչպես նաև Մենթերի, Շումանի, Վիվալդիի, Պերգոլեզեի մահվան տարելիցներին:
Այս տարի միջոցառմանը կհյուրընկալեն այնպիսի հանրաճանաչ երաժիշտներ, ինչպիսիք են Դմիտրի Նովգորոդսկին ԱՄՆ-ից (դաշնամուր), Անի Աղաբեկյանը Գերմանիայից (ջութակ), Տիգրան Հախումյանը Գերմանիայից (ջութակ), Տիգրան Մահտեսյանը Բելգիայից (ջութակ):
Փառատոնի նպատակներն են` երիտասարդ կատարողների ներուժի բացահայտումը, հայկական ժամանակակից երաժշտության քարոզումը, ողջ աշխարհի հայազգի կոմպոզիտորների միջև կապի հաստատումը:
ՀՀ մշակույթի նախարարության ֆինանսական աջակցության ներքո իրականացվող փառատոնի գեղարվեստական ղեկավարն է Արամ Թալալյանը:
«Նովոստի-Արմենիա» գործակալությունը փառատոնի տեղեկատվական հովանավորն է: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
