ԵՐԵՎԱՆ, 18 օգոստոսի․ /Նովոստի-Արմենիա/․ «Ցույց տուր ինձ, ինչ ունես» (Show Me What You Got) ֆիլմը նվաճել է San Antonio Film Fest միջազգային կինոփառատոնի գլխավոր մրցանակը: Ֆիլմի պրոդյուսերներն են «BLITZ FILM» ընկերությունը, Սերգեյ և Նիկոլայ Սարկիսովները, Դեյվիդ Սքոթ-Սմիթը և Ֆիլիպ Նոյսը: Փառատոնը առաջին անգամ անցկացվել է առցանց՝ իր 26-ամյա պատմության ընթացքում: Մրցույթին մասնակցել է մոտ 30 լիամետրաժ ֆիլմ ԱՄՆ-ից, Ճապոնիայից, Իսպանիայից, Բուլղարիայից, Հնդկաստանից, Իսրայելից և այլ երկրներից: Այս մասին հայտնում է «BLITZ FILM» ընկերության մամուլի ծառայությունը։
«Ցույց տուր ինձ, ինչ ունես» ֆիլմը դարձել է արդեն ճանաչված վավերագրական կինոռեժիսոր Սվետլանա Ցվետկոյի ռեժիսորական դեբյուտը, ով երկու անգամ նոմինացվել է «Օսկար»-ի վավերագրական նախագծերի համար։
Загружается новость ... "Лево"
Ֆիլմի սյուժեի համաձայն, երեք երիտասարդներ Մարսելոն, Նասիմը և Քրիստինան ծանոթանում են իրենց համար ծանր պահին: Նրանք արագորեն կապվում են միմյանց, և նրանց ճակատագրերը միահյուսվում են ամենաանհավատալի ձևով: Երիտասարդները սիրահարվում են, ստեղծագործում են, մասնակցում են քաղաքական բողոքների, քանի դեռ Իտալիա կատարած համատեղ ուղևորությունը չի սպառնում նրանց հարաբերություններին:
«Ֆիլմը պատմություն է սիրո, սեքսի և բարեկամության մասին: Այն միջազգային է, քանի որ հերոսները տարբեր երկրներից են՝ Իտալիա, Ֆրանսիա և ԱՄՆ: Ես ուրախ եմ այն հնարավորության համար, որն ինձ տրամադրեց «BLITZ FILM»-ը: Նիկոլայ Սարկիսովը անմիջապես աջակցեց իմ գաղափարը, երբ ես պատմեցի ապագա ծրագրի կոնցեպտի մասին », - բացատրել է Ցվետկոն:
Ֆիլմն արդեն արժանացել է մրցանակների՝ Տաորմինայի (Գրան պրի), Սիենայի (Լավագույն արտասահմանյան կինոնկար), Ռոչեսթերի (Լավագույն գեղարվեստական կինոնկար) և Սանտա Ֆեի (Լավագույն օպերատորական աշխատանք) կինոփառատոներում:
Սան Անտոնիոյի SAFILM կինոփառատոնը հիմնադրվել է 1994 թվականին: Այժմ այն Հարավային Տեխասի ամենամեծ կինոփառատոնն է:
Սերգեյ Սարկիսովը «ՌԵՍՈ-Գարանտիա» ապահովագրական ընկերության հիմնադիրներից և ղեկավարներից մեկն է, 2016-ին անցել է կինոմատոգրաֆիային՝ ավարտելով Սցենարիստների և ռեժիսորների բարձրագույն դասընթացները, և ինքն արդեն հանդես է եկել որպես ռեժիսոր: Իր որդու՝ Նիկոլայի հետ, ով նույնպես ռեժիսոր է, հիմնել է «Բլից Ֆիլմ» միջազգային պրոդյուսերական ընկերությունը, որը մասնագիտանում է լիամետրաժ և կարճամետրաժ ֆիլմերի, երաժշտական տեսահոլովակների և գովազդների արտադրության և առաջխաղացման մեջ: -0-
