«Մանկական Եվրատեսիլ 2019»–ում հաղթեց Լեհաստանը, Հայաստանը 9–րդն է (ՖՈՏՈ, ՎԻԴԵՈ)

ԵՐԵՎԱՆ, 24 նոյեմբերի./Նովոստի–Արմենիա/. Քիչ առաջ Լեհաստանի Գլիվիցե քաղաքում ավարտվեց «Մանկական Եվրատեսիլ 2019» մրցույթը։

Ազգային ժյուրիի և հեռուստադիտողների քվեարկության արդյունքում հաղթող ճանաչվեց Լեհաստանը ներկայացնող Վիկտորիա Գաբորը, ով վաստակեց 278 միավոր։

Հայաստանը ներկայացնող Կարինա Իգնատյանը «Colors of your dream» երգով զբաղեցրեց 9–րդ տեղը` վաստակելով 115 միավոր։

«Մանկական Եվրատեսիլ 2019» մրցույթն անցկացվեց նոյեմբերի 24–ին Լեհաստանի Գլիվիցե քաղաքում։ Բացի Հայաստանից, մրցույթին մասնակցում էին 18 երկրների` Ավստրալիայի, Ֆրանսիայի, Ռուսաստանի, Հյուսիսային Մակեդոնիայի, Իսպանիայի, Վրաստանի, Բելառուսի, Մալթայի, Ուելսի, Ղազախստանի, Լեհաստանի, Իռլանդիայի, Ուկրաինայի, Նիդերլանդների, Պորտուգալիայի, Իտալիայի, Ալբանիայի, Սերբիայի ներկայացուցիչները։

Կարինան ծնվել է Կալուգայում, սկսել է երգել վեց տարեկանից։ 2017թ.–ին Կարինան մասնակցել է Ռուսական Առաջին ալիքով հեռարձակված «Ձայնը. երեխաներ» հեռուստանախագծում, նրա մարզիչն էր Դիմա Բիլանը։ 2019թ.–ին պատանի երգչուհին մասնակցել է «Մանկական Նոր ալիք» մրցույթում` զբաղեցնելով 4–րդ տեղը։–0–