Հայաստանում թողարկվել է արծաթե հուշադրամ` հանրահայտ ռեժիսոր Անրի Վեռնոյի 100-ամյակի կապակցությամբ (ՖՈՏՈ)

ԵՐԵՎԱՆ, 20 մայիսի․ /Նովոստի-Արմենիա/․ Հայաստանի կենտրոնական բանկը թողարկել է արծաթե հուշադրամ` հանրահայտ ֆրանսիացի ռեժիսոր Անրի Վեռնոյի (իսկական անուն ՝ Աշոտ Մալաքյան) 100-ամյակի կապակցությամբ:

Ինչպես հայտնում է ԿԲ մամուլի ծառայությունը, 100 դրամ անվանական արժեքով  հուշադրամը պատրաստված է 9250 հարգի արծաթից։
 
Դիմերեսին պատկերված է Անրի Վեռնոյին շնորհված Ֆրանսիայի Պատվո լեգեոնի շքանշանը, «Փարաջանովյան թալեր» և «Սեզար» մրցանակների պատկերները։
Դարձերեսին` Անրի Վեռնոյի դիմապատկերը, կինոժապավեն և «Արգելված պտուղը» (1952 թ․) ու «Մի գիշերվա պատմությունը» (1960 թ․) կինոնկարների պաստառներից հատվածներ։

Կենսագրություն

Անրի Վեռնոյ (Աշոտ Մալաքյան, 1920-2002), ֆրանսիացի հայազգի կինոռեժիսոր, գրող, Ֆրանսիայի գեղարվեստի ակադեմիայի անդամ: Սովորել է Մարսելի կիրառական արվեստի դպրոցում, այնուհետև՝ Էքսան-Պրովանսի ֆրանսիական լիցեյում, որն ավարտելուց հետո անցել է լրագրողական աշխատանքի: 1945 թ. «Լա Մարսելյեզ» թերթում Անրի Վեռնոյ կեղծանունով հրապարակել է Հայկական հարցի մասին հոդվածների շարք: 1948 թ-ից աշխատել է կինոյում. աշխարհահռչակ դերասանների մասնակցությամբ ստեղծել է 40-ից ավելի կինոնկարներ («Արգելված պտուղ» (1952 թ.), «Մաքսիմ» (1958 թ.), «Նախագահը» (1961 թ.) և այլն):

Ժամանակակից կինոարվեստի լավագույն օրինակներից է Անրի Վեռնոյի «Մայրիկ» կենսագրական ֆիլմը, որը նկարահանվել է 1991 թ. և ներկայացնում է Հայոց ցեղասպանությունից մազապուրծ եղած և Ֆրանսիա գաղթած հայ ընտանիքի պատմություն: 1996 թ. կինոնկարն արժանացել է Ֆրանսիայի «Սեզար» մրցանակի, իսկ սցենարը թարգմանվել և հրատարակվել է տասնյակ լեզուներով` դառնալով հայի անկոտրում ոգու և վերապրումի խոսուն վկայագիրը: -0-