Հայաստանի մասնակից Մալենան առաջինն է «Մանկական Եվրատեսիլ-2021»–ի առցանց քվեարկության արդյունքում (ՎԻԴԵՈ)

ԵՐԵՎԱՆ, 9 դեկտեմբերի./Նովոստի–Արմենիա/. «Մանկական Եվրատեսիլ-2021» երգի միջազգային մրցույթում Հայաստանի պատվիրակ 14–ամյա Մալենան առաջինն է մրցույթի պաշտոնական կայքում կազմակերպված առցանց քվեարկության արդյունքում։

Նշենք, որ դեկտեմբերի 19–ին Փարիզում կայանալիք մրցույթին Մալենան հանդես է գալու «Քամի, քամի» ստեղծագործությամբ։

Առցանց քվեարկության արդյունքում Մալենայի օգտին քվեարկել է օգտատերերի 13%–ը, երկրորդ տեղում Վրաստանն է` 11%, երրորդ տեղում Ֆրանսիան է` 9%, չորրորդը Լեհաստանն է` 8%, հինգերորդ տեղում Ռուսաստանն է` 8%։ Նյութի հրապարակման պահին առցանց քվեարկությանը մասնակցել է 26 237 օգտատեր։

Նշենք, որ Մալենայի «Քամի, քամի» ստեղծագործության տեսահոլովակը YouTube–ում ռեկորդներ է գրանցում։ YouTube–ում տեսահոլովակի պրեմիերան տեղի է ունեցել նոյեմբերի 19–ին, մոտ 2 շաբաթում այն հավաքել է 2 միլիոնից ավել դիտում։

Երգի երաժշտության հեղինակն է Դավիթ Բադալյանը (tokionine), խոսքերի հեղինակներն են Վահրամ Պետրոսյանը, Դավիթ Բադալյանը, Մալենան և Դավիթ Ծերունյանը, երաժշտական պրոդյուսեր՝ Անուշիկ Տեր-Ղուկասյան։

«Մանկական Եվրատեսիլ 2021» երգի միջազգային մրցույթին մասնակցում է 19 երկիր։ Մրցույթը տեղի կունենա դեկտեմբերի 19-ին՝ Ֆրանսիայի մայրաքաղաք Փարիզում։–0–