«Դալի և Պիկասո» երևանյան ցուցահանդեսի ժամկետը կերկարացվի. ԷՔՍԿԼՅՈւԶԻՎ

ԵՐԵՎԱՆ, 19 մարտի./Նովոստի–Արմենիա/. Մարտի 7–ին Հայաստանի ազգային պատկերասրահում բացված «Դալի և Պիկասո» երևանյան ցուցահանդեսի ժամկետը կերկարացվի, «Նովոստի–Արմենիա» գործակալությանը տեղեկացրեց պատկերասրահի մամուլի քարտուղար Անուշ Նիկողոսյանը։


«Ազգային պատկերասրահի տնօրեն Արմեն Ծատուրյանն արդեն խոսել է կոլեկցիոներ Ալեքսանդր Շադրինի հետ (ցուցադրվում են Շադրինի մասնավոր հավաքածուի ցուցանմուշները, խմբգր.), կա պայմանավորվածություն, ցուցահանդեսն անպայման կերկարացվի», – ասաց նա։
Նիկողոսյանը նշեց, որ ձեռք բերված բոլոր տոմսերը կգործեն, երբ ցուցահանդեսը կրկին բացվի, իսկ երկարացման կոնկրետ ժամկետները հայտնի կլինեն ապրիլի 14–ից հետո։

ՀՀ կառավարությունը մարտի 16–ից մինչև ապրիլի 14–ը հայտարարել է արտակարգ դրություն կորոնավիրուսի տարածումը կանխելու նպատակով։ Փակ են թանգարանները, համերգասրահները, գրադարաններն ու թատրոնները։

Ցուցանմուշներում ներառված է մեծանուն նկարիչների մոտ 260 աշխատանք, որոնց թվում են գրաֆիկական և կավագործական աշխատանքներ, քանդակներ։ Ներկայացված է բավականին մասշտաբային ցուցահանդես ութ սրահներում։ Կան աշխատանքներ, որոնք չեն ներառվել ցուցանմուշներում, քանի որ տեղը չի բավարարել։ Կան մոտ 260 աշխատանքներ, որոնցից շատերը ստեղծվել են Սալվադոր Դալիի կողմից` քանդակներ և գրաֆիկական աշխատանքներ։ Իսկ Պիկասոն ներկայացված է 30 կերամիկական աշխատանքներով և 29 գրաֆիկական դիմանկարներով։

«Նովոստի–Արմենիա» գործակալությունը լուսաբանել է ցուցահանդեսի նախաբացումը, որի մասին նյութին կարելի է ծանոթանալ` անցնելով այս հղմամբ։–0–