Առաջ, Հայաստան. մեկնարկել է «Մանկական Եվրատեսիլ 2019» մրցույթի քվեարկությունը (ՎԻԴԵՈ)

ԵՐԵՎԱՆ, 23 նոյեմբերի./Նովոստի–Արմենիա/. Մեկնարկել է «Մանկական Եվրատեսիլ 2019» երգի մրցույթը։ Մրցույթում Հայաստանը ներկայացնում է Կարինա Իգնատյանը «Colors of your dream» երգով։ Կարինան հանդես կգա 15 համարի ներքո։

Մենք բոլորս բացառիկ հնարավորություն ունենք օգնելու մեր մասնակցին հաղթել մրցույթում։ Պարզապես պետք է անցնել հղումով և քվեարկել մեր պատվիրակի` Կարինա Իգնատյանի օգտին։ Քվեարկել կարող եք ցանկացած երկրից (նաև ԱՄՆ-ից)  և տարբեր սարքավորումներով (հեռախոս, պլանշետ, համակարգիչ)։ Իսկ ինչպես քվեարկել` դիտեք տեսանյութը։

«Մանկական Եվրատեսիլ 2019» մրցույթը կանցկացվի նոյեմբերի 24–ին Լեհաստանի Գլիվիցե քաղաքում։ Բացի Հայաստանից, մրցույթին մասնակցում են 18 երկրների` Ավստրալիայի, Ֆրանսիայի, Ռուսաստանի, Հյուսիսային Մակեդոնիայի, Իսպանիայի, Վրաստանի, Բելառուսի, Մալթայի, Ուելսի, Ղազախստանի, Լեհաստանի, Իռլանդիայի, Ուկրաինայի, Նիդերլանդների, Պորտուգալիայի, Իտալիայի, Ալբանիայի, Սերբիայի ներկայացուցիչները։

Կարինա Իգնատյանի «Colors of your dream» երգի տեսանյութի պրեմիերան տեղի է ունեցել նոյեմբերի 2–ին։ Տեսահոլովակի նկարահանումներն անցկացվել են Ռուսաստանում, ռեժիսորն է Անգելինա Միռոշնիչենկոն, օպերատորը՝ Սերգեյ Դիշյուկը։ Տեսահոլովակն աչքի է ընկնում լուսային հատուկ լուծումներվ և գրաֆիկական էֆեկտներվ, որոնք էլ ավելի տպավորիչ են դարձնում հայաստանյան ներկայացուցչի կատարումը։