«Պատերազմի հետքերը». Արցախի մասին պատմող գերմանացի ռեժիսորի ֆիլմը կցուցադրվի Երևանում

ԵՐԵՎԱՆ, 15 սեպտեմբերի. /Նովոստի–Արմենիա/. Երևանում կցուցադրվի Արցախի մասին պատմող գերմանացի ռեժիսոր Յանա Ռիխտերի «Պատերազմի հետքերը» ֆիլմը։

Ինչպես հաղորդում է «Շարմ Հոլդինգ» ընկերությունը, «Պատերազմի հետքերը» ֆիլմը Studio DS, Richter Production, Nur Film Group ընկերությունների համատեղ արտադրանքն է:

Մի շարք միջազգային փառատոներին մասնակցելուց և մրցանակներ շահելուց հետո հեղինակները որոշեցին ցուցադրություն կազմակերպել Հայաստանում և Արցախում։

Ֆիլմը պատմում է Զուար և Հավսաթաղ գյուղերում ապրող մարդկանց առօրյա կյանքի և կենցաղի պատմությունը: Ծովակը գյուղի դպրոցի տնօրենն է, միաժամանակ դասավանդում է մաթեմատիկա և ֆիզիկա: Նա իր ընտանիքի հետ ապրում է Զուար գյուղում: Սայաթը պրոֆեսիոնալ պարող է, սակայն ներկա պահին նա Հավսաթաղի գյուղապետն է, որտեղ և ապրում է իր ընտանիքի հետ միասին:

Նկարահանմանը մասնակցել են արցախցիներ, ովքեր ծնվել ու մեծացել են Արցախում, ովքեր եկել ու ապրում են այնտեղ և կապել են իրենց ճակատագիրն այս հողի հետ:

Գյուղերը գտնվում են մի երկրում, որը «գոյություն չունի»:

Ֆիլմը նկարահանվել է մոտ տասը տարի առաջ այն վայրերում, ուր դեռ թարմ էին պատերազմի հետքերը:

Ֆիլմի հիմնական նպատակն է ցույց տալ, որ Արցախի ժողովուրդը շարունակում է կառուցել և ապրել իր հողի վրա հույսով, որ քսան տարուց ավել տևող զինադադարը մի օր կվերածվի իրական խաղաղության պայմանագրի: Պատերազմը կդադարի, և աշխարհը կտեսնի, որ երկիրը գոյություն ունի:

Ֆիլմի պրոդյուսերն է Դավիթ Սաֆարյանը, սցենարի հեղինակ և ռեժիսոր՝ Յանա Ռիխտեր

Ֆիլմը, մասնավորապես, նկարահանվել է Ամարասում, Դադիվանքում, Գողտանիքում, Հավսաթաղում, Զուարում, Մարտունիում, Շուշիում, Մարտակերտում, Ստեփանակերտում։

Ֆիլմում հնչում է դասական և ժողովրդական երաժշտություն, ինչպես նաև կատարումներ՝ «Արցախի Ձայներ» երգչախմբի կողմից:–0–