Մահացել է հայտնի դերասան Անտոն Ելչինը

ԵՐԵՎԱՆ, 20 հունիսի. /Նովոստի-Արմենիա/. Հոլիվուդյան ռուս դերասան Անտոն Ելչինը մահացել է ԱՄՆ-ի Կալիֆոռնիա նահանգում դժբախտ պատահարի հետևանքով:

Այս մասին հաղորդել է Լոս Անջելեսի ոստիկանության պաշտոնական ներկայացուցիչ Ջեննի Հոյզերը, հաղորդում է ՏԱՍՍ-ը:

Նրա խոսքով, 27-ամյա դերասանը «մեկնել է հանդիպման ընկերների հետ, որպեսզի մասնակցի փորձի, և քանի որ շատ է ուշացել հանդիպումից, ընկերները գնացել են Լոս Անջելեսի արվարձաններում գտնվող նրա տուն։ Այնտեղ էլ հայտնաբերել են Ելչինի դին: Ամենայն հավանականությամբ, նա կարճ ժամանակով դուրս է եկել մեքենայից` թողնելով այն ճանապարհի վրա: Մեքենան տեղից հետ է ընթացել և սեղմել Ելչինին աղյուսե սյանը, ինչի հետևանքով դերասանը վնասվածք է ստացել, որն էլ հանգեցրել է մահվան», - նշել է Հոյզերը:

TMZ ինտերնետային պորտալի տվյալներով, Ելչինի մարմնի հայտնաբերման ժամանակ մեքենայի շարժիչը միացված է եղել, սակայն ոստիկանության աշխատակիցները պաշտոնապես դեռ չեն հաստատել այս տվյալները:

Տեղեկատվական հարթակի աղբյուրները նշում են, որ իրավապահները դեպքը համարում են դժբախտ պատահար:

Ելչինը ծնվել է 1989 թ.-ին Լենինգրադում` պրոֆեսիոնալ գեղասահորդների ընտանիքում: Մոտ մեկուկես տարեկանում ծնողների հետ ԽՍՀՄ-ից տեղափոխվել է ԱՄՆ: Ֆիլմերում սկսել է նկարահանվել դեռ մանուկ հասակից:

Դերանին ճանաչվածություն են բերել «Անցյալի գաղտնիքները» (House of D), «Ալֆա Դոգ» (Alpha Dog), «Աստղային ճանապարհ» (Star Trek), «Տերմինատոր. փրկիչը» (Terminator Salvation) ֆիլմերը:

Ելչինին առանձնահատուկ հանրաճանաչություն է բերել տիեզերքի ռուսախոս հետազոտող Պավել Չեխովի դերը «Աստղային ճանապարհ» գիտաֆանտաստիկ ֆիլմաշարում։

Ամերիկյան ԶԼՄ-ների տվյալներով, Ելչինը լավ տիրապետում էր ռուսերենին: Նա մի շարք կինոմրցանակների, այդ թվում` երիտասարդ դերասաններին շնորհվող կինոմրցանակների դափնեկիր է։ -0-