ԵՐԵՎԱՆ, 8 հուլիսի./Նովոստի–Արմենիա/. Այսօր` հուլիսի 8–ին, Արամ Խաչատրյանի անվան համերգասրահում տեղի ունեցավ «Ոսկե ծիրան» հոբելյանական XV միջազգային կինոփառատոնի բացման արարողությունը։
Ինչպես հայտարարեց ՀՀ մշակույթի նախարար Լիլիթ Մակունցը, 15 տարվա ընթացքում «Ոսկե ծիրանը» արժանի տեղ է զբաղեցրել միջազգային փառատոնների շրջանում, ինչի մասին վկայում է փառատոնի հյուրերի, մասնակիցների և ֆիլմերի թիվը։
««Ոսկե ծիրանն» անցել է երկար, բարդ, բայց բեղմնավոր ճանապարհ», – նշեց Մակունցն ու ընդգծեց, որ փառատոնը հնարավորություն ընձեռեց աշխարհին ներկայացնելու Հայաստանն ու հայկական կինոն, իսկ հայ հասարակությանը`ծանոթանալ համաշխարհային կինեմատոգրաֆի նորույթներին։
Կինոփառատոնի բացման արարողությանը ներկա էին ՀՀ վարչապետ Նիկոլ Փաշինյանն ու նախագահ Արմեն Սարգսյանը, ինչպես նաև մշակույթի, քաղաքականության գործիչներ, օտարերկրյա դիվանագետները։
Կինոփառատոնի ժյուրին
Խաղարկային ֆիլմերի ժյուրիի նախագահն է իրանցի կինոռեժիսոր, սցենարիստ ու պրոդյուսեր, «Ոսկե արջ», «Ոսկե գլոբուս» մրցանակների դափնեկիր, օսկարակիր Ասղար Ֆարհադին։
Վավերագրական ֆիլմերի ժյուրիի կազմը գլխավորում է հայտնի ռեժիսոր–վավերագիր Չժաո Լյանը (Չինաստան)։
Կինոփառատոնի մասնակիցներն ու ծրագրերը
Կինոփառատոնի «Հայկական համայնապատկեր» մրցութային ծրագրի շրջանակում կցուցադրվի 9 երկիր ներկայացնող 27 ֆիլմ։ Միջազգային կինեմատոգրաֆը կներկայացնեն 110 ֆիլմեր։
Փառատոնի շրջանակում իրենց բացառիկ ծրագրերը կներկայացնեն ՀՀ–ում Ֆրանսիայի, Բուլղարիայի, Շվեդիայի և Գերմանիայի դեսպանատները։ Ֆրանսիայի դեսպանատան աջակցությամբ կներկայացվի 15 ֆիլմից բաղկացած «Ֆրանկոֆոն երկրների կինո» ծրագիրը, որը կմեկնարկի հուլիսի 10–ին ռեժիսոր Վալերի Մասադյանի «Միլա» ֆիլմի ցուցադրմամբ։
ՀՀ–ում Շվեդիայի դեսպանատունը մեծ աջակցություն է ցուցաբերել շվեդ ռեժիսոր Ինգմար Բերգմանի 100–ամյակին նվիրված հոբելյանական հանդիսությունների ծրագրի կազմակերպմանը։ Կկազմակերպվի Բերգմանի ֆիլմերի հետահայաց ցուցադրություն։
Բուլղարական կինեմատոգրաֆը կներկայացնի Իլիյան Ջևելեկովի «Ամենագոն» (Omnipresent) և Կոստանդին Բոնևի «Բնաջնջում» ֆիլմերը։
Այս տարի գերմանական ֆիլմերը կընդգրկվեն «Պատրաստված է Գերմանիայում» (("Hergestellt in Deutschland") ծրագրում (5 ֆիլմ)։
Նոր աստղեր և հյուրեր
Հոբելյանական կինոփառատոնի պատվավոր հյուրերն են հայտնի կինոռեժիսորներ Դարեն Արոնոֆսկին, Ջանֆրանկո Ռոզին, Ուլրիխ Զայդլին և Շոն Բեյքերը։
Փառատոնի շրջանակում հուլիսի 9–ին Շառն Ազնավուրի հրապարակում կհայտնվեն երեք հռչակավոր հայ կինոգործիչների` ռեժիսորներ Ալբերտ Մկրտչյանի, Արա Վահունու և Ներսես Հովհաննիսյանի աստղերը։–0–
