Կինոռեժիսոր Մարտին Սկորսեզեն առաջին անգամ կինեմատոգրաֆի առցանց դասընթացներ կվարի

ԵՐԵՎԱՆ, 24 սեպտեմբերի./Նովոստի-Արմենիա/. Կինոռեժիսոր Մարտին Սկորսեզեն մտադիր է փորձել ուժերն առցանց ուսուցման մեջ. նա դասախոսություններ կկարդա կինեմատոգրաֆի վերաբերյալ։

Այս մասին հայտնում է ՏԱՍՍ-ը` հղում անելով Variety-ին:

Ռեժիսորը մտադիր է առցանց դասախոսությունները սկսել արդեն հաջորդ տարվա սկզբին MasterClass ինտերնետ-հարթակի օգնությամբ: Սկորսեզեի դասընթացները կարժենան 90 դոլար, ինչը 20 դասախոսությունների անսահմանափակ հասանելիության հնարավորություն կտա: Նախնական գրանցումը բացվել է սեպտեմբերի 22-ից:

Դասախոսությունների ժամանակ ռեժիսորը մանրամասն կուսումնասիրի սեփական կինոնկարները, ինչպես նաև կպատմի նկարահանումների նկատմամբ իր մոտեցումների մասին: Կինոռեժիսորը, մասնավորապես, կպատմի, թե ինչպես պետք է կառուցել պատմությունը ֆիլմում, կներկայացնի մոնտաժի ու նկարահանումների ժամանակ դերասանների հետ աշխատելու գաղտնիքները:

Դասախոսությունների համար վճարողները հնարավորություն կստանան ներբեռնել լրացուցիչ նյութեր և ամեն դասի ամփոփումը: Բացի դրանից, ամեն մեկը հնարավորություն կունենա տեսահարց ուղղել ռեժիսորին, որոնցից մի քանիսին նա ավելի ուշ կպատասխանի:

«Ես հիացած եմ այս նախագծով, քանի որ այն ինձ հնարավորություն է տալիս կիսվել իմ ոգևորությամբ, փորձով: Դա չի լինի ինչ-որ կլիշե ֆիլմեր նկարահանելու համար, բայց ուղղություն կտա երիտասարդներին, որոնք դեռ իրենց ճանապարհն են փնտրում այս կյանքում», - ասվում է Սկորսեզեի կողմից տարածած հաղորդագրությունում:

Սկորսեզեի ամենահայտնի գործերի շարքից են «Տաքսի» (Taxi Driver, 1976), «Փառավոր տղաներ» (Goodfellas, 1990), «Ավիատորը» (The Aviator, 2004), «Անիծվածների կղզի» (Shutter Island, 2010), ինչպես նաև «Ուրացողները» կինոժապավենները, վերջինս նրան «Օսկար» է բերել «Լավագույն ռեժիսոր» անվանակարգում:–0–