ԵՐԵՎԱՆ, 10 հուլիսի. /Նովոստի–Արմենիա/. «Ոսկե ծիրան» XIII միջազգային կինոփառատոնի շրջանակում, Երևանի Շառլ Ազնավուրի հրապարակում, «վառվեցին» երեք աստղեր` հռչակավոր հայ կինոգործիչների հիշատակին։
Այդ կինոգործիչներն են ռեժիսորներ Էդմոնդ Քեոսայանը, Դմիտրի Կեսայանցի ու օպերատոր Ալբերտ Յավուրյանը։ Հատկանշական է, որ օպերատորի հիշատակի «աստղը» բացվում է Երևանում առաջին անգամ։
Ծիրանի օծման արարողությամբ նշանավորվեց «Ոսկե ծիրան» կինոփառատոնի բացումը>>
«Այս մարդիկ մեծ ժառանգություն են թողել հայկական կինեմատոգրաֆի պատմության մեջ», – հանդիսավոր արարողության ժամանակ ասաց կինոփառատոնի հիմնադիր և տնօրեն, կինոռեժիսոր–վավերագիր Հարություն Խաչատրյանը։
Այս տարի «Ոսկե ծիրան» XIII միջազգային կինոփառատոնը նվիրված է Հայաստանի Հանրապետության անկախության 25–ամյակին։ Կինոփառատոնի շրջանակում կներկայացվի մոտ 135 ֆիլմ, որոնցից 43–ը` մրցութային երեք ծրագրերում` «Խաղարկային ֆիլմերի մրցույթ», «Վավերագրական ֆիլմերի մրցույթ» և «Հայկական համայնապատկեր»։
Կինոփառատոնի շրջանակում կցուցադրվեն համաշխարհային կինեմատոգրաֆի վարպետների գլուխգործոցները «Երևանյան պրեմիերա», «Հայացք դրսից և ներսից», «Հատուկ ցուցադրում», «Հայ կինո. նոր ժամանակներ», «Շեքսպիրն ապրում է կինոյում», «Ֆրանսիական կինոծրագիր», «Դանիական նոր կինո» և «Բասկական նոր կինո» ծրագրերի շրջանակում։
ԱՄԻ «Նովոստի-Արմենիա» գործակալությունը փառատոնի ինֆորմացիոն հովանավորն է:
«Ոսկե ծիրան» 13–րդ միջազգային կինոփառատոնին կներկայացվի մոտ 135 ֆիլմ։ Այս տարի փառատոնի պատվավոր հյուրը կլինի բրիտանացի կինոդերասանուհի, համաշխարհային կինեմատոգրաֆի աստղ Ժակլին Բիսեթը։
«Ոսկե ծիրան» միջազգային կինոփառատոնը Երևանում անցկացվում է 2004թ.-ից, այն տարածաշրջանի ամենաճանաչված փառատոներից մեկն է: Փառատոնը կազմակերպվում է ՀՀ մշակույթի նախարարության և VivaCell-MTS ընկերության աջակցությամբ։ Տարբեր տարիներին Հայաստան են ժամանել հայտնի դերասաններ և ռեժիսորներ, որոնց թվում նաև` գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։
2010 թվակաժնին Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին:–0–
