«Նովոստի–Արմենիա»–ն պարգևատրվել է Fresco–ի շնորհակալագրով

ԵՐԵՎԱՆ, 31 օգոստոսի. /Նովոստի–Արմենիա/. «Նովոստի–Արմենիա» միջազգային լրատվական գործակալությունը պարգևատրվել է FRESCO ժամանակակից արվեստի և հոգևոր ֆիլմերի չորրորդ միջազգային փառատոնի շնորհակալագրով։

Շնորհակալագիրը տրվում է «FRESCO ժամանակակից արվեստի և հոգևոր ֆիլմերի չորրորդ միջազգային փառատոն» նախագծի տեղեկատվական աջակցության համար։

Փառատոնը մեկնարկել է օգոստոսի 25–ին և կտևի մինչև սեպտեմբերի 3–ը։ Փառատոնի ընթացքում Երևանում Կարապի լճի հարակից տարածքներում և զբոսայգիներում կանցկացվեն անվճար կինոդիտումներ բաց երկնքի տակ, համերգներ, կինոճամբարներ, վարպետության դասեր։
Փառատոնի շրջանակում բնության սիրահարների համար վրանային ճամբարներ են անցկացվել Լոռու մարզում` Հաղպատ, Սանահին եկեղեցիների տարածքում, Ախթալայում և Քոբայրում։

Լուսանկարչության սիրահարների համար Երևանում և մարզերում կազմակերպվել են վարպետության դասեր իսրայելցի լուսանկարիչ Դմիտրի Բրիկմանի և ճապոնացի լուսանկարիչ Հայաթո Մացումոտոյի մատուցմամբ։

«Նովոստի–Արմենիա» գործակալությունը փառատոնի լրատվական հովանավորն է։ -0-