Պավել Վոլյան գաղտնիքներ է բացում Comedy Club–ի երևանյան ելույթի վերաբերյալ

ԵՐԵՎԱՆ, 18 օգոստոսի. /Նովոստի–Արմենիա/. Comedy Club–ը Երևանում ելույթ կունենա հատուկ ծրագրով, Cosmo ամսագրին տված հարցազրույցում պատմել է Comedy Club–ի ռեզիդենտ, ռուսաստանցի հայտնի շոումեն Պավել Վոլյան։

Comedy Club–ի փառատոնը կանցկացվի առաջին անգամ Հայաստանի մայրաքաղաքում սեպտեմբերի 15–ին և 16–ին և նվիրված կլինի քաղաքի 2800–ամյակին։

«Փառատոնը կոնկրետ վայր չունի։ Մենք ենք ընտրում, թե ուր գնանք և որտեղ կատակենք։ Մի քանի անգամ ելույթ ենք ունեցել Յուրմալայում, երկու անգամ` Սոչիում, այժմ հասանք նաև Հայաստան»,– ասել է Վոլյան։

Ըստ նրա, փառատոնի գլխավոր անակնկալը «ոսկե կազմի» ելույթն է լինելու։ «Նույնիսկ Գարիկ Մարտիրոսյանը կվերադառնա»,– ընդգծել է նա։


Հայտնի հումորիստը նշել է, որ սա իր առաջին այցը չէ Հայաստան, նա շատ անգամ է այնտեղ եղել։
«Երևանն աշխարհում իմ ամենասիրած քաղաքներից է։ Ինձ միշտ այնտեղ ընդունում են, կարծես, ես Գարիկի եղբայրն եմ։ Ինձ թվում է, որ այսքան տարիների ընթացքում յուրաքանչյուր ռեզիդենտի մոտ ինչ–որ հայկական բան է հայտնվել»,– ասել է Վոլյան։

Ծրագրվում է, որ Երևան կժամանեն Գարիկ Մարտիրոսյանը, Պավել Վոլյան, Գարիկ Խառլամովը, Տիմուր Բատրուդինովը, Դեմիս Կարիբիդիսը, Անդրեյ Սկորոխոդը, Միխայիլ Գալուստյանը, Ալեքսանդր Ռևան, Զուրաբ Մատուան, Անդրեյ Ավերինը, Դմիտրի Լյուսյոկ Սորոկինը, Մարինա Կրավեցը, «Սմիրնով, Իվանով, Սոբոլև» եռյակը, Ժենյա Սինյակովը, Դմիտրի Գրաչյովը և նույնիսկ USB խումբը, որը ՌԴ տարածքում արգելված է երաժշտական լավ ճաշակ ունեցող մարդկանց համար: -0-