ԵՐԵՎԱՆ, 27 հուլիսի. /Նովոստի–Արմենիա/. Հնդկաստանից ժամանած մի խումբ կինեմատոգրաֆիստներ Հայաստանում նկարահանում են լիամետրաժ ֆիլմ, «Նովոստի–Արմենիա» գործակալությանը հայտարարեց «Շարմ Հոլդինգ» ընկերության գլխավոր պրոդյուսեր Լիլիթ Մարտիրոսյանը։
«Դա սիրային մելոդրամ է, որը պատմում է հնդիկ զույգի մասին, ով գալիս է Հայաստան` կրթություն ստանալու նպատակով։ Ֆիլմը նախատեսված է Հնդկաստանում ցուցադրության համար։ Նկարահանումները մեկնարկել են հուլիսի սկզբին, կավարտվեն օգոստոսի 1–ին։ Ֆիլմը Հնդկաստանի մեծ էկրաններին կհայտնվի տարեվերջին», – հայտարարեց Մարտիրոսյանը։
Նա ավելացրեց, որ Հայաստանի տարածքում առաջին անգամ է հնդկական ֆիլմ նկարահանվում։
«Վստահ ենք, որ սա լուրջ հայտ և մարտահրավեր է Հայաստանի կինոարդյունաբերության հետագա զարգացման համար», – ասաց Մարտիրոսյանը։
Նրա խոսքով, Հայաստանում նկարահանվում են ֆիլմի առանձին դրվագներ։ Նկարահանումները հիմնականում տեղի են ունենում Սևանում և Երևանում։ Մասսայական դրվագներում նկարահանվում են սկսնակ հայ դերասաններ։
Հայաստանում հնդկական կինո նկարահանելու նախաձեռնության հեղինակը Հնդկաստանում ՀՀ արտակարգ և լիազոր դեսպան Արմեն Մարտիրոսյանն է։
«Մշակութային փոխանակման գործընթացները յուրաքանչյուր երկրի զարգացման կարևոր բաղադրիչներից են։ Փոխգործակցության հիանալի միջոց կդառնա ՀՀ–ում հնդկական կինոյի նկարահանման հնարավորությունը։ Առաջարկելով համագործակցություն «Շարմ Հոլդինգ» ընկերության հետ` Արմեն Մարտիրոսյանը տվեց կինոարտադրության ոլորտում երկրների բարենպաստ գործընկերության մեկնարկը», – ավելացրեց Մարտիրոսյանը։
«Շարմ Հոլդինգ» ընկերությունը հնդիկ կինեմատոգրաֆիստներին տրամադրում է տեխնիկական աջակցություն, ինչպես նաև օգնում է կազմակերպչական հարցերում։
«Հնդկաստանն այն երկիրն է, որտեղ ամեն տարի նկարահանվում է ավելի քան 1000 ֆիլմ, ինչը ռեկորդային է կինոարդյունաբերության համար։ Դեսպանը, ծանոթանալով հնդկական կինոշուկայի առանձնահատկություններին, կինեմատոգրաֆիստներին որպես ֆիլմերի նկարահանման լանդշաֆտ առաջարկել է Հայաստանը, որտեղ իսկապես կարելի է նկարահանել գեղեցիկ կինո», – ասաց Մարտիրոսյանը։
«Շարմ Հոլդինգ» ընկերությունը մտադիր է հետագայում ևս զարգացնել հայկական կինոարդյունաբերությունը և փորձում է ներգրավել օտարերկրյա կինոարտադրողների։–0–
