Բացառիկ հնարավորություն. «Խոստումը» ֆիլմի երկրպագուները կկարողանան հոլիվուդյան աստղերի հետ անցնել «կարմիր գորգով»

ԵՐԵՎԱՆ, 17 մարտի. /Նովոստի-Արմենիա/. System of A Down ռոք խմբի մենակատար Սերժ Թանգյանը Հայոց ցեղասպանության մասին առաջին հոլիվուդյան «Խոստումը» ֆիլմի ստեղծողների հետ կազմակերպել է բարեգործական ակցիա` նվիրված ֆիլմի պրեմիերային, որը տեղի կունենա ապրիլի 21-ին:

«Մենք ցանկանում ենք հրավիրել ձեզ «Խոստումը» ֆիլմի պրեմիերային: Դուք կհանդիպեք ինձ, Քրիս Քորնելին, Քրիստիան Բեյլին, կքայլեք կարմիր գորգով և կմասնակցեք VIP երեկույթին: Ավիատոմսերի և հյուրանոցի հարցը կլուծենք մենք: Դե ի՞նչ կասեք` միանո՞ւմ եք մեզ», – գրել է Թանկյանը Facebook–յան իր էջում։

Մրցույթին մասնակցելու համար ցանկացողները պետք է որոշակի գումար նվիրաբերեն և վիճակահանության համապատասխան կտրոն ստանան:

Ակցիան անցկացվում է AGBU-ի հետ միասին (The Armenian General Benevolent Union) բարեգործական Omaze.com առցանց սերվիսում։

Հանգանակված ողջ գումարը կուղղվեն հազարավոր հայ ընտանիքների կենսական կարևորություն ունեցող հարցերի լուծմանը, ովքեր ապրում են հակամարտությունների տարածաշրջաններում և տուժել են Սիրիայում ու Իրաքում ընթացող պատերազմի հետևանքով:


Մրցույթի հաղթողները կստանան անվճար տոմս դեպի Լոս Անջելես և հնարավորություն բնակվելու չորսաստղանի հյուրանոցում, ինչպես նաև ուղեգիր «Խոստումը» ֆիլմի պրեմիերային, որը տեղի կունենա լեգենդար Grauman կինոթատրոնում: Հաջողակները կկարողանան հանդիպել այնպիսի աստղերի հետ, ինչպիսիք են Քրիստիան Բեյլը, Քրիս Քորնելը, Սերժ Թանգյանը, Անժելա Սարաֆյանը, ռեժիսոր Թերի Ջորջը, ինչպես նաև կկարողանան մասնակցել բացառիկ VIP երեկույթին։

«Խոստում» ֆիլմը մեծ էկրաններ կբարձրանա 2017 թ.-ի ապրիլի 21-ին:

Ֆիլմի ռեժիսորն է Թերի Ջորջը, ով առաջադրվել է «Օսկարի» «Ռուանդայի հյուրանոց» ֆիլմի համար` որպես լավագույն ռեժիսոր: Ֆիլմի սցենարի հեղինակն է Ռոբին Սվայկորդը:

Ֆիլմի գլխավոր դերակատարներն են աշխարհահռչակ դերասաններ Քրիստիան Բեյլը, Օսկար Այզեքը և Շառլոտա Լը Բոնը: Ֆիլմում նկարահանվել են նաև ֆրանսիացի աստղ Ժան Ռենոն, ինչպես նաև Ջեյմս Քրոմվելը և Անժելա Սարաֆյանը:

Ֆիլմի գլխավոր հերոսներն են ուսանող-բժիշկ Միքայել Պողոսյանը (Օսկար Այզեքը), ֆոտոլրագրող Քրիս Մայերը (Քրիստիան Բեյլ), ով ժամանել է Օսմանյան կայսրություն՝ լուսաբանելու աշխարհաքաղաքական իրադարձությունները և Փարիզում սովորող հայ նկարչուհի Աննան (Շառլոտա Լը Բոն): Բովանդակությունը կառուցված է նրանց սիրային եռանկյան շուրջ՝ Օսմանյան կայսրությունում Հայոց ցեղասպանության տարիներին: -0-