Երևանում Կվիլինգի ցուցահանդես է բացվել
ԵՐԵՎԱՆ, 18 նոյեմբերի. /Նովոստի–Արմենիա/. Հայաստանի երիտասարդական հիմնադրամի շենքում չորեքշաբթի Կվիլինգի ցուցահանդես է բացվել։
Ցուցահանդեսին ներկայացված են նկարչուհի Նաիրա Ավետիսյանի շուրջ 30 աշխատանքները, որոնց հիմքում ընկած են աշխարհահռչակ նկարիչների ստեղծագործությունները, ինչպես նաև նկարչուհու սեփական գաղափարները։
«Հավաքածուն հավաքել եմ չորս տարվա ընթացքում, քանի որ մեկ նկարի համար բավականին շատ ժամանակ է պահանջվում` 15 օրից մինչև մեկ ամիս», – «Նովոստի–Արմենիա» գործակալությանն ասաց աշխատանքների հեղինակը։
Նա նշեց, որ ստեղծագործությունները ներկայացված են տարբեր ոճերում` ուրվագծային կվիլինգից մինչև քաոսային և խճանկարային ոճեր։
«Իմացել եմ արվեստի այս ուղղության մասին չորս տարի առաջ` Լոնդոնում կազմակերպված ցուցահանդեսի ժամանակ։ Այնտեղ ներկայացված աշխատանքներն ինձ շատ հետաքրքրեցին, և ես սկսեցի ուսումնասիրել արվեստի այս ուղղությունը», – ընդգծեց Ավետիսյանը։ –0–
