Երևանում ցուցադրվում են Հայաստանի մասին պատմող` Աբաս Քիառոսթամիի լուսանկարները

ԵՐԵՎԱՆ, 12 հուլիսի. /Նովոստի–Արմենիա/. Օրերս կյանքից հեռացած, հայտնի իրանցի կինոռեժիսոր Աբաս Քիառոսթամիի լուսանկարների ցուցահանդեսը երեքշաբթի բացվել է Երևանում` «Ոսկե ծիրան» XIII կինոփառատոնի շրջանակում, հաղորդում է «Նովոստի–Արմենիա» գործակալության թղթակիցը։

«Ճանապարհ» խորագրով ցուցադրության մեջ ներառվել են լուսանկարներ, որոնք ժամանակակից կինոյի դասականը լուսանկարել է Հայաստան կատարած չորս այցերի ընթացքում և նվիրել «Ոսկե ծիրան» փառատոնին։ Ցուցահանդեսը կտևի մինչև փառատոնի ավարտը։

Փառատոնի շրջանակում, Քիառոսթամիի հիշատակին, կցուցադրվի նրա ամենահայտնի ֆիլմը` «Բալի համը»։

Իրանցի հայտնի կինոռեժիսոր, սցենարիստ և պրոդյուսեր Քիառոսթամին մահացել է հուլիսի 4–ին Փարիզում ծանր հիվանդության հետևանքով։ Քիառոսթամին 76 տարեկան էր։ Նա Կաննի կինոփառատոնի «Ոսկե արմավենու», Վենետիկի կինոփառատոնի հատուկ մրցանակի դափնեկիր է։


«Ոսկե ծիրան» 13–րդ միջազգային կինոփառատոնին կներկայացվի մոտ 135 ֆիլմ։ Այս տարի փառատոնի պատվավոր հյուրը կլինի բրիտանացի կինոդերասանուհի, համաշխարհային կինեմատոգրաֆի աստղ Ժակլին Բիսեթը։

«Ոսկե ծիրան» միջազգային կինոփառատոնը Երևանում անցկացվում է 2004թ.-ից, այն տարածաշրջանի ամենաճանաչված փառատոներից մեկն է: Փառատոնը կազմակերպվում է ՀՀ մշակույթի նախարարության և VivaCell-MTS ընկերության աջակցությամբ։ Տարբեր տարիներին Հայաստան են ժամանել հայտնի դերասաններ և ռեժիսորներ, որոնց թվում նաև` գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։

2010 թվակաժնին Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին:–0–