Երևանում Վարազդատ թագավորի մասին մուլտֆիլմ կնկարահանեն

ԵՐԵՎԱՆ, 24 դեկտեմբերի./Նովոստի–Արմենիա/. «Ռոբերտ Սահակյանց փրոդաքշն» ստուդիան աշխատում է «Օլիմպիկոս» նոր լիամետրաժ անիմացիոն ֆիլմի ստեղծման վրա, տեղեկացրեց ստուդիայի ղեկավար, ռեժիսոր–մուլտիպլիկատոր Դավիթ Սահակյանցը։

 «Ֆիլմը պատմում է Վարազդատ թագավորի և IV դարում Օլիմպիական խաղերի ժամանակ նրա տարած հաղթանակի մասին», – հինգշաբթի ասուլիսի ժամանակ նշեց Սահակյանցը։

Նա նաև հույս հայտնեց, որ ֆիլմն ամբողջությամբ պատրաստ կլինի երեք տարի հետո։ «Մենք գրեթե ավարտել ենք, մնացել են երաժշտական և ձայնային մասերը», – պարզաբանեց նա։

Հայ պատմագիրների բնութագրմամբ` Վարազդատ թագավորը շատ ուժեղ մարդ էր, նա հաղթել է մ.թ. 385 թվականին Հին Հունաստանում կազմակերպված օլիմպիական 291–րդ խաղերում։

Սահակյանցը տեղեկացրել է, որ ստուդիան աշխատում է նաև «Կլոր Աստվածներ» կարճամետրաժ մուլտֆիլմի վրա` գրող Վրթանես Փափազյանի համանուն ստեղծագործության հիման վրա։

2014 թ.–ին տեղի ունեցավ «Ռոբերտ Սահակյանց փրոդաքշն» ստուդիայի «Անահիտ» լիամետրաժ անիմացիոն ֆիլմի պրեմիերան, որը նկարահանվել է գրող Ղազարոս Աղայանի հեքիաթի մոտիվներով։ –0–