ԵՐԵՎԱՆ, 9 հունիսի. /Նովոստի–Արմենիա/. «Գայանե» բալետի տապալման մեջ մեղավոր երաժիշտներն անպայման կպատժվեն, ուրբաթ լրագրողներին ասաց Ալ. Սպենդիարյանի անվան օպերայի և բալետի ազգային ակադեմիական թատրոնի գործադիր տնօրենի տեղակալ Կարինե Կիրակոսյանը։
Արամ Խաչատրյանի «Գայանե» բալետը պետք է տեղի ունենար հունիսի 8–ին Օպերայի և բալետի ազգային ակադեմիական թատրոնում, սակայն չեղյալ հայտարարվեց, քանի որ նվագախումբը հրաժարվեց բեմ դուրս գալ։ Դահլիճում ներկա էին ինչպես տեղաբնակներ, այնպես էլ օտարերկրյա հյուրեր։
«Անկախ անձնական խնդիրներից` արտիստն իրավունք չունի դրսևորել անհարգալից վերաբերմունք հանդիսատեսի նկատմամբ», – ընդգծեց Կիրակոսյանն ու նշեց, որ նման վարքն անընդունելի է ցանկացած արտիստի համար։
Նրա խոսքով, ՀՀ մշակույթի նախարար Արմեն Ամիրյանն իր տեղակալների հետ ուրբաթ ժողով է կազմակերպել, որի ընթացքում թատրոնի կոլեկտիվին ասվել է, որ միջադեպի մեղավորներն անպայման կպատժվեն` ՀՀ աշխատանքային օրենսգրքի համաձայն։
Ինչպես նշել է Կիրակոսյանը, ժողովի ընթացքում Ամիրյանը մի քանի անգամ առաջարկել է բոյկոտի կազմակերպիչներին ոտքի կանգնել և բացատրել պատճառները, ներկայացնել պահանջները, սակայն ներկաներից ոչ ոք ոչինչ չի ասել։
Նրա խոսքով, երեկվա բալետում պետք է մասնակցեր 80–90 երաժիշտ։
«Հիմա նրանք բոլոր բացատրականներ են գրում», – ավելացրեց նա։
Կիրակոսյանը նշեց, որ տապալված բալետից մի քանի օր առաջ թատրոնի ադմինիստրատիվ կոլեկտիվի աշխատակիցներից 10–ը (թատրոնի կոլեկտիվի թիվն ընդհանուր առմամբ 583 է) հեռացվել էին աշխատանքից հաստատության աշխատանքի արդյունավետության բարձրացման նպատակով։ Ընդ որում, «կրճատման» տակ հայտնված աշխատակիցների թվում էին գործադիր տնօրենի երեք տեղակալներ։
Առաջիկայում թատրոնում նախատեսվում է կազմակերպել ատեստավորում, որը, ինչպես նշում է Կիրակոսյանը, կհանգեցնի կրճատման արդեն գեղարվեստական խմբում ։
Վերջում Կիրակոսյանը նշեց, որ տապալված բալետի տոմսերի արժեքը կփոխհատուցվի։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում