«Ոսկե ծիրանի» հիմնադիրը պարգևատրվել է «Ոսկե Պրոմեթևս» մրցանակով

ԵՐԵՎԱՆ, 11 հուլիսի. /Նովոստի–Արմենիա/. Թբիլիսիի միջազգային կինոփառատոնի տնօրեն Գագա Չխեիձեն երկուշաբթի «Ոսկե ծիրան» Երևանի միջազգային կինոփառատոնի հիմնադիր և տնօրեն Հարություն Խաչատրյանին է հանձնել Թբիլիսիի կինոփառատոնի գլխավոր մրցանակը` «Ոսկե Պրոմեթևսը»։

«Իմ ֆիլմն արդեն արժանացել է այս փառատոնի մրցանակին։ Հիմա գնահատվում է կինեմատոգրաֆում կատարած ներդրումս», – ասաց Խաչատրյանը։

Չխեիձեն ավելացրեց, որ մրցանակն ունի նաև բոնուս` «Կինձմարաուլի» գինի։

«Ոսկե ծիրան» XIII միջազգային կինոփառատոնն անցկացվում է Երևանում հուլիսի 10–17–ը։

ԱՄԻ «Նովոստի-Արմենիա» գործակալությունը փառատոնի ինֆորմացիոն հովանավորն է:

Այս տարի փառատոնի պատվավոր հյուրը կլինի բրիտանացի կինոդերասանուհի, համաշխարհային կինեմատոգրաֆի աստղ Ժակլին Բիսեթը։

Այս տարի «Ոսկե ծիրան» XIII միջազգային կինոփառատոնը նվիրված է Հայաստանի Հանրապետության անկախության 25–ամյակին։ Կինոփառատոնի շրջանակում կներկայացվի մոտ 135 ֆիլմ, որոնցից 43–ը` մրցութային երեք ծրագրերում` «Խաղարկային ֆիլմերի մրցույթ», «Վավերագրական ֆիլմերի մրցույթ» և «Հայկական համայնապատկեր»։

Կինոփառատոնի շրջանակում կցուցադրվեն համաշխարհային կինեմատոգրաֆի վարպետների գլուխգործոցները «Երևանյան պրեմիերա», «Հայացք դրսից և ներսից», «Հատուկ ցուցադրում», «Հայ կինո. նոր ժամանակներ», «Շեքսպիրն ապրում է կինոյում», «Ֆրանսիական կինոծրագիր», «Դանիական նոր կինո» և «Բասկական նոր կինո» ծրագրերի շրջանակում։

«Ոսկե ծիրան» միջազգային կինոփառատոնը Երևանում անցկացվում է 2004թ.-ից, այն տարածաշրջանի ամենաճանաչված փառատոներից մեկն է: Փառատոնը կազմակերպվում է ՀՀ մշակույթի նախարարության և VivaCell-MTS ընկերության աջակցությամբ։ Տարբեր տարիներին Հայաստան են ժամանել հայտնի դերասաններ և ռեժիսորներ, որոնց թվում նաև` գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։

2010 թվակաժնին Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին:–0–