ԵՐԵՎԱՆ, 7 ապրիլի./Նովոստի–Արմենիա/. Վլադիմիր և Սաթի Սպիվակովների դուստրը` Տատյանա Սպիվակովան կնկարահանվի ռեժիսոր Ջիվան Ավետիսյանի «Դրախտի դարպասը» ֆիլմում, որը պատմում է Արցախի մասին, գրում է «Ժամ» կրթամշակութային ամսագիրը։
«Հայոց լեզվի երաժշտությունն արյանս մեջ է, և ես շատ ուրախ եմ, որ հնարավորություն ունեմ վերադառնալ Արցախ` Շուշի, որտեղ ծնվել է իմ նախատատը`Եպրաքսյան։ Հասկանում եմ, որ այս ֆիլմը շատ բան կբացահայտի ինձ համար», – նշել է դերասանուհին։
Տատյանա Սպիվակովայի և ռեժիսոր Ջիվան Ավետիսյանի հանդիպումը պատահական չէր։ Թատերական բեմը նախընտրող դերասանուհին նախորդ տարի հայտնվեց միևնույն բեմում աշխարհի 50 դերասանների հետ, որոնց թվում էր նաև հայ դերասան Վահրամը, ով Ջիվանի մտերիմ ընկերն է։ Հենց Վահրամը ծանոթացրեց դերասանուհուն ռեժիսորի հետ։ Այդ ընթացքում Ավետիսյանը դերասանուհի էր փնտրում իր նոր ֆիլմի համար։
Загружается новость ... "Лево"
Ավետիսյանի «Թևանիկ», «Վերջին բնակիչը» ֆիլմերը նվիրված են Արցախին։ «Դրախտի դարպասները» ֆիլմը ռեժիսորի` թվով երրորդ լիամետրաժ գեղարվեստական ֆիլմն է։ Հիմա քրաուդֆանդինգային ֆինանսական արշավ է ընթանում ֆիլմի նկարահանման համար։
Նկարահանումները նախատեսվում է սկսել օգոստոսին Արցախում։
Սպիվակովայի կարծիքով, Ջիվան Ավետիսյանն այն հազվագյուտ ռեժիսորներից է, ում հաջողվում է ճիշտ նկարահանել ու փոխանցել պատերազմի դաժանությունը։ Դերասանուհին արդեն ծանոթ է ֆիլմի սցենարին, և նրան շատ մոտ է ֆիլմի գլխավոր հերոսուհու` Սոֆիայի կերպարը։
«Սոֆիան կարծես self-made woman–ն է` ժամանակակից, ուժեղ, իմպուլսիվ, մյուս կողմից նա կին է, ով ելք է փնտրում իր անցյալից, փորձում է հասկանալ, պարզել կյանքի բոլոր մութ կողմերը», – նշել է Սպիվակովան։
Տատյանան ցավում է, որ 5–օրյա այցի ընթացքում չի հասցնի այցելել Արցախ, սակայն կհանդիպի նկարահանող խմբի անդամների հետ։ Նրա կարծիքով, Skype–ի, էկրանի միջոցով շփումը չափազանց ժամանակակից է, իսկ այստեղ նրանք կկարողանան հանդիպել դեմ առ դեմ, քննարկել սցենարը, փորձել կոստյումները և պարզապես զբոսնել Երևանի ջերմ փողոցներով։–0–
