ԵՐԵՎԱՆ, 15 դեկտեմբերի. /Նովոստի–Արմենիա/. Աշխարհահռչակ դաշնակահար Եվգենի Կիսինը New York Times հրատարակությանը տված հարցազրույցում հայտարարել է, որ մտադիր չէ համերգ տալ Թուրքիայում, քանի դեռ այդ երկրի կառավարությունը չի ճանաչել 1915 թ.–ին տեղի ունեցած Հայոց ցեղասպանությունը։
«Վստահ եմ, որ եթե մարդիկ նման պետություններում իմանան, որ շատ երաժիշտներ հրաժարվում են ելույթ ունենալ իրենց երկրներում, քանի որ մտահոգված են իշխանությունների գործողությունների կապակցությամբ, ապա դա կբարձրացնի իրազեկվածության մակարդակը մտավորականության շրջանում», – ասել է նա։
Կիսինն ավելացրել է, որ չի դատապարտում այն գործընկերներին, ովքեր ելույթ են ունենում տոտալիտար երկրներում։ «Դա իրենց ընտրությունն է», – նշել է երաժիշտը։
Եվգենի Կիսինը ելույթ է ունեցել Հայաստանում 2012 և 2015 թթ.–ին, ինչպես նաև երկրում նախաձեռնել է խոշոր հումանիտար նախագծեր։
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի, Լյուքսեմբուրգի խորհրդարանները, Կանադայի խորհրդարանի համայնքների պալատը և Լեհաստանի սեյմը, Պարագվայի Սենատը,Վատիկանը, Եվրախորհդարանը, Եկեղեցիների համաշխարհային խորհուրդը։ -0-
