Ջիվան Ավետիսյանը ղարաբաղյան պատերազմի մասին նոր ֆիլմ է նկարահանում

ԵՐԵՎԱՆ, 22 հունվարի. /Նովոստի–Արմենիա/. Հայտնի կինոռեժիսոր Ջիվան Ավետիսյանը, ով համաշխարհային ճանաչում ստացած «Թևանիկ» և «Վերջին բնակիչը» գեղարվեստական ֆիլմերի հեղինակն է, սկսել է աշխատել «Gate to Heaven» («Դրախտի դարպասը») նոր լիամետրաժ ֆիլմի վրա։

Ինչպես նշվում է ֆիլմի Facebook–յան պաշտոնական էջում, ֆիլմը վարձույթում կհայտնվի 2018 թ.–ի ամռանը։ Այն պատմում է ղարաբաղյան պատերազմի, ինչպես նաև այդ իրադարձությունների հետ կապված մարդկանց ճակատագրերի մասին։


Ֆիլմի սցենարիստ է Արտավազդ Եղիազարյանը (գրող, լրագրող , խմբագիր), սցենարի համահեղինակն է Մկո Մալխասյանը, ով 2003թ.-ից աշխատում է որպես ազատ (ֆրիլանս) օպերատոր: Մալխասյանը կարիերայի ընթացքում նկարահանել է ավելի քան 100 երաժշտական և գովազդային հոլովակ: 2006թ.-ից աշխատում է որպես գեղարվեստական և վավերագրական ֆիլմերի օպերատոր: Աշխատել է միջազգային ծրագրերի վրա Եվրոպայում, Աֆրիկայում, Ռուսաստանում և ԱՄՆ-ում:

Ֆիլմը հիմնականում կնկարահանվի Արցախում, այդ թվում` որոշ գյուղերում ու մայրաքաղաք Ստեփանակերտում։

Ֆիլմի գլխավոր հերոսուհու կերպարը կմարմնավորի դերասանուհի Նաիրա Զաքարյանը, ով բնակվում է ԱՄՆ–ում։ Զաքարյանը հանդես է եկել մի քանի տասնյակ ներկայացումներում, այդ թվում` Մոսկվայի գեղարվեստական թատրոնում, նկարահանվել է յոթ գեղարվեստական ֆիլմերում։ 2014 թ.–ին մասնակցել է «Միսս Եվրոպա գլոուբ» մրցույթին, որտեղ զբաղեցրել է երրորդ տեղը, իսկ արդեն 2015 թ.–ին ներառվել է «Միսս ԱՄՆ գլոուբ» մրցույթի ժյուրիի կազմում։–0–