Հայաստանի պետական երիտասարդական նվագախումբն այսօր ելույթ կունենա Բեթհովենի Զատկի փառատոնում

ԵՐԵՎԱՆ, 11 ապրիլի. /Նովոստի-Արմենիա/. Երեքշաբթի Հայաստանի պետական երիտասարդական նվագախումբը Վարշավայում կմասնակցի Լյուդվիգ վան Բեթհովենի անվան Զատկի փառատոնին, «Նովոստի-Արմենիա» գործակալությանը հայտնեցին նվագախմբի մամուլի ծառայությունից։

«Դիրիժոր Սերգեյ Սմբատյանի ղեկավարությամբ` Երիտասարդական նվագախումբը կկատարի Ղազարոս Սարյանի Սիմֆոնիկ պատկերները, Արամ Խաչատրյանի Թավջութակի և նվագախմբի կոնցերտ-ռապսոդիան (մենակատար՝ Նարեկ Հախնազարյան, թավջութակ), Նիկոլայ Ռիմսկի-Կորսակովի «Շեհերազադ» սիմֆոնիկ պոեմը (մենակատար` Յարոսլավ Նադրզիցկի, ջութակ)», - նշվում է հաղորդագրության մեջ։

Համերգը տեղի կունենա Վարշավայի ֆիլհարմոնիկ համերգասրահում։ Երիտասարդական նվագախմբի ելույթը Բեթհովենի Զատկի փառատոնում նվիրված է Հայաստանի Հանրապետության և Լեհաստանի միջև դիվանագիտական հարաբերությունների հաստատման 25-ամյակին, ինչպես նաև՝ Լեհաստանի հայկական համայնքի ձևավորման 650-ամյա հոբելյանին։

Բեթհովենի Զատկի փառատոնը երաժշտական աշխարհի խոշորագույն իրադարձություններից է։ Այն այս տարի անցկացվում է ապրիլի 2-17-ը։

Ապրիլի 12-ին Հայաստանի պետական երիտասարդական նվագախումբը համերգով ելույթ կունենա Լյուբլինի (Լեհաստան) Centrum Spotkania Kultur-ի օպերային դահլիճում: Նվագախմբի գլխավոր գործընկերն է ՎիվաՍել-ՄՏՍ-ը: -0-