Հայաստանի մասին աննախադեպ ցուցահանդես կանցկացվի Նյու Յորքում

ԵՐԵՎԱՆ, 4 ապրիլի. /Նովոստի-Արմենիա/. 2018 թ.-ի աշնանը Նյու Յորքի աշխարհահռչակ «Մետրոպոլիտեն» թանգարանում կանցկացվի Հայաստանին նվիրված աննախադեպ ցուցահանդես, չորեքշաբթի հայ լրագրողներին ասաց թանգարանի ղեկավար Հելեն Էվանսը:

«2018 թ.-ի սեպտեմբերի 21-ին «Մետրոպոլիտեն» արվեստի թանգարանում կկայանա Հայաստանին, հայ արվեստին նվիրված ցուցահանդեսի բացումը: Շատ ուրախ եմ, որ այսօր այստեղ եմ արդեն երկրորդ անգամ, չէ՞ որ մենք սկսում են ամրապնդել կապը Հայաստանի հետ», - ասաց Էվանսը:

Նրա խոսքով, ցուցահանդեսին ներկայացվելու են հայ մշակույթի գլուխգործոցները` սկսած քրիստոնեության ընդունումից, մինչև 17-րդ դար: Էվանսը նշեց, որ ցուցահանդեսը առավելապես կներկայացնի վիզուալ հայ մշակույթը, ինչպես նաև` հրատարակչական գործը:

«Առանձնահատուկ շնորհակալություն եմ հայտնում Հայաստանի կառավարությանը` ի դեմս ՀՀ մշակույթի նախարարության` 2008 թ.-ին «Մետրոպոլիտեն» թանգարանին նվիրած խաչքարի համար, որը ներառվել է մեր թանգարանի մշտաան ցուցադրության մեջ և շատ կարևոր ցուցանմուշ է: Դրա շարունակությունը կդառնա Հայաստանին նվիրված ցուցահանդեսը», - ասաց Էվանսը:

Ցուցահանդեսին իրենց ցուցանմուշները կներկայացնի երեք թանգարան` Հայաստանի պատմության թանգարանը, Մայր Տաճար Սուրբ Էջմիածնի թանգարանը և «Մատենադարանը»:

Ցուցահանդեսի կազմակերպման աշխատանքները տարվում են 2013 թ.-ից` ՀՀ մշակույթի նախարարության անմիջական ղեկավարության ներքո:

«2014 թ.-ին «Մետրոպոլիտեն» թանգարանի նախկին տնօրենն իր գրքում գրել է հայերի նվիրած խաչքարի մասին, որ դրա միջոցով հայկական մշակույթը կարող է ներկայացվել որպես համաշխարհային մշակույթի մաս: Ցուցահանդեսի նպատակն է` զուգահեռներ անցկացնել հայկական և համաշխարհային մշակութային ժառանգության միջև», - ավելացրեց Էվանսը:

«Մետրոպոլիտեն» թանգարանի ղեկավարը և ևս երկու միջազգային փորձագետ Հայաստանում են «Թանգարանային ցուցահանդես. նախագծում և դիզայն» թեմայով սեմինարի շրջանակում, որի նպատակն է Հայաստանում ղեկավարական արհեստի զարգացումը: Չորս օրվա ընթացքում միջազգային մասնագետներն իրենց փորձը կփոխանցեն իրենց հայ գործընկերներին: Նախագիծը ֆինանսավորվում է USAID «Իմ Հայաստանը» ծրագրի շրջանակում: -0-