«Գազպրոմ-մեդիա հոլդինգն» ու ՀՀՌԸ–ն կզբաղվեն համատեղ ֆիլմարտադրությամբ

ԵՐԵՎԱՆ, 19 դեկտեմբերի. /Նովոստի–Արմենիա/. «Գազպրոմ-մեդիա հոլդինգը» մտադիր է համագործակցել Հանրային հեռուստառադիոընկերության հետ համատեղ ֆիլմարտադրության ոլորտում, երեքշաբթի հայտարարեց «Գազպրոմ-մեդիա հոլդինգի» կինոյի և հեռուստատեսության խմբի գլխավոր տնօրեն Ռաֆայել Մինասբեկյանը ՀՀ նախագահ Սերժ Սարգսյանի հետ հանդիպման ժամանակ, հաղորդում է ՀՀ նախագահի մամուլի ծառայությունը։

Մինասբեկյանի խոսքով, համագործակցությունն ուղղված կլինի հայ-ռուսական դարավոր բարեկամության ամրապնդմանը՝ ներկայացնելով երկու ժողովուրդների համատեղ ձեռքբերումները, անցած ուղին և ընդհանուր արժեքները:

Հանրապետության նախագահը ողջունել և կարևորել է երկկողմ կապերի ամրապնդմանն ուղղված նման նախաձեռնությունները և պատրաստակամություն հայտնել հնարավորինս աջակցել դրանց իրագործմանը:
Հանդիպմանը ներկա է եղել նաև Հայաստանի hանրային հեռուստառադիոընկերության խորհրդի նախագահ Ռուբեն Ջաղինյանը:–0–