Չայկովսկու անվան սիմֆոնիկ նվագախումբը համերգ կտա Երևանում

ԵՐԵՎԱՆ, 14 հունիսի. /Նովոստի–Արմենիա/. Երևանում կկայանա Չայկովսկու անվան սիմֆոնիկ նվագախմբի համերգը` լեգենդար դիրիժոր Վլադիմիր Ֆեդոսևի ղեկավարությամբ։ Համերգի ժամանակ կհնչեն հռչակավոր կոմպոզիտորներ Արամ Խաչատրյանի և Պյոտոր Չայկովսկու ստեղծագործությունները։

Համերգը տեղի կունենա հունիսի 25–ին Արամ Խաչատրյանի անվան համերգասրահում` «Երևանյան հեռանկարներ» փառատոնի շրջանակում և ՎՏԲ 24 բանկի աջակցությամբ։ Համերգի ժամանակ որպես մենակատար ելույթ կունենա պատանի հայ ջութակահար Դիանա Ադամյանը։

«Մեծ ուրախություն և պատասխանատվություն է լինել Երևանում։ Մենք մեծ կապեր ունենք ձեր մշակույթի հետ։ Շատ լավ եք զգում ձեր երաժշտությունը` ձեր ժողովրդական երաժշտությունը։ Երջանիկ ենք, որ մեր մշակութային կապերը վերսկսվում են։ Դա հիանալի է։ Երաժշտությունը պետք է միայն միավորի։ Աշխարհում հիմա շատ են բացասական երևույթներն ու իրադարձությունները, և ես հույս ունեմ, որ երաժշտությունը կհաղթի», – ասաց մաեստրո Ֆեդոսևը չորեքշաբթի ասուլիսի ժամանակ` շնորհակալություն հայտնելով համերգի կազմակերպիչներին ջերմ ընդունելության համար։


ՎՏԲ խումբը` ի դեմս ՎՏԲ 24 բանկի, աջակցում է Չայկովսկու անվան սիմֆոնիկ նվագախմբի հունիսյան շրջագայությանը, որի շրջանակում համույթն արդեն ելույթ է ունեցել Լիպեցկում, Վորոնեժում և Կալինինգրադում։

Ինչպես նշեց ՎՏԲ–Հայաստան Բանկի գլխավոր տնօրեն, տնօրինության նախագահ Յուրի Գուսևը, շատ կարևոր է, որ շրջագայությունը կազմակերպվում է մաեստրո Ֆեդոսևի 85–ամյակի նախաշեմին։

Նրա խոսքով, բանկը հետևում է մշակութային իրադարձություններին ու մտադիր է հետագայում ևս աջակցել մշակույթի և արվեստի ոլորտներում անցկացվելիք միջոցառումներին։

«Հույս ունեմ, որ սա նվագախմբի հետ միակ համագործակցությունը չէ։ Եվ առջևում մեզ սպասում են բազմաթիվ նախագծեր», – նշեց Գուսևը` նվագախմբին մաղթելով հաջող ելույթ։

«Նովոստի–Արմենիա» միջազգային լրատվական գործակալությունը «Երևանյան հեռանկարներ» փառատոնի ինֆորմացիոն հովանավորն է։–0–