Աշխարհահռչակ դաշնակահար Եվգենի Կիսինը ամուսնացել է հայուհու հետ (ԼՈԻՍԱՆԿԱՐ)

ԵՐԵՎԱՆ, 16 մարտի. /Նովոստի-Արմենիա/. Աշխարհահռչակ դաշնակահար Եվգենի Կիսինը ամուսնացել է իր մանկության ընկերուհու` Կարինե Արզումանովայի հետ, հաղորդում է դասական երաժշտության ոլորտի լրատվական կայքը:

Հարթակի տվյալներով, պսակադրությունը տեղի է ունեցել 2017թ.-ի մարտի 10-ին Պրահայում, որտեղ ապրում է Կարինեն:



Դաշնակահար Եվգենի Կիսինը ծնվել է 1971 թվականի հոկտեմբերի 10-ին Մոսկվայում, ռուսական հրեաների ընտանիքում։

Բազմիցս համերգներով եղել է Հայաստանում, իսկ վերջին այցերից մեկի ժամանակ նա Երևան է եկել Կարինե Արզումանովայի հետ:

Կիսինը ելույթներ է ունեցել աշխարհի մի շարք խոշոր քաղաքներում, այդ թվում՝ Լոնդոնում, Միլանում, Փարիզում, Զալցբուրգում, Վիեննայում և այլուր։

Կիսինն արժանացել է բազմաթիվ երաժշտական պարգևների ու մրցանակների։ 2005 թվականին դարձել է Լոնդոնի թագավորական երաժշտական ակադեմիայի պատվավոր անդամ, նույն թվականին արժանացել է Հերբերտ ֆոն Կարայանի անվան երաժշտական մրցանակին։ 2012 թվականին ՀՀ նախագահի հրամանագրով պարգևատրվել է Պատվո շքանշանով:

Ապրում է Նյու Յորքում և Լոնդոնում: -0-