Արծվիկը փայլեց «Եվրատեսիլ 2017»–ի եզրափակչում (ՏԵՍԱՆՅՈՒԹ)

ԵՐԵՎԱՆ, 13 մայիսի. /Նովոստի–Արմենիա/. Հայաստանը «Եվրատեսիլ 2017»–ում ներկայացնող Արծվիկը փայլուն ելույթ ունեցավ մրցույթի եզրափակչում` կատարելով Fly With Me երգը։

Ուկրաինայի մայրաքաղաք Կիևում շաբաթ երեկոյան մեկնարկել է մրցույթի եզրափակիչը, որի ընթացքում Արծվիկը հանդես եկավ 5–րդ համարի ներքո։

Արծվիկի երգի երաժշտության համահեղինակներն են Լևոն և Լիլիթ Նավասարդյանները, խոսքերի համահեղինակները՝ Ավետ Բարսեղյանը և Դավիթ Ծերունյանը:

Երգի մեղեդային գիծը համադրում է աշխարհի տարբեր էթնիկ երաժշտությունների առանձնահատկությունները, այն ընդհանրությունները, որոնք զարմանալիորեն առկա են: Երգի հիմքում մի աղջկա կյանքի պատմություն է, ով մարմնավորում է սերը: Նա համադրում է կյանքի տարբեր գույները և հավաքում աշխարհի հեքիաթները, այն պատմությունները, որոնք պատմում են մեզ, թե ովքեր ենք մենք իրականում: Ընդգրկելով աշխարհի ողջ բազմազանությունը՝ աղջիկը թռչում է վեր՝ դեպի երկնային բարձունքներ, և դառնում արև, որի սերն ու լույսն ընդհանուր են բոլորի համար՝ միակը բոլորիս համար։

Մրցույթի եզրափակչին մասնակցում է 26 երգիչ և երաժշտական կոլեկտիվ` 10–ական երկու կիսաեզրափակիչներից, ինչպես նաև հյուրընկալ երկրի` Ուկրաինայի, մրցույթի հիմնադիր և գլխավոր հովանավոր երկրների` Մեծ Բրիտանիայի, Գերմանիայի, Իսպանիայի, Իտալիայի և Ֆրանսիայի ներկայացուցիչները։ –0–