ԵՐԵՎԱՆ, 14 նոյեմբերի. /Նովոստի-Արմենիա/. Մեկնարկել է «Ժողովրդական ապրանքանիշ №1 Հայաստանում – 2016» չորրորդ ամենամյա մրցանակաբաշխության առցանց քվեարկությունը, երկուշաբթի «Նովոստի-Արմենիա» մամուլի կենտրոնում հայտարարեց մրցանակաբաշխության կազմակերպիչ «Սպառողների աջակցման կենտրոնի» նախագահ Աշոտ Միրզոյանը։
«Հայաստանում մրցանակը շնորհվում է 2013 թ.-ից: Այս տարի մենք մի քանի փոփոխություն ենք մտցրել անվանակարգերի ցուցակում: Ավանդաբար այն շնորհվել է սննդի արդյունաբերության ոլորտի հայրենական ընկերություններին, իսկ այս տարի մենք որոշեցինք ավելացնել նաև նոր ոլորտներ», - նշեց Միրզոյանը` ավելացնելով, որ քվեարկել կարելի է
www.armbrand.am կայքում:
Նա ընդգծեց, որ այս տարի մրցանակը կշնորհվի տասն անվանակարգերում` «Գարեջուր», «Նրբերշիկ», «Շոկոլադե պանրիկ», «Հաց», «Օղի», «Յոգուրտ», «Համեմունքներ», «Կոշիկ», « Տեքստիլ» և «Տաքսի ծառայություն»:
«Այս տարի մենք նոր անվանակարգեր ենք ներմուծել` «Կոշիկ», «Տեքստիլ» և «Տաքսի ծառայություն»: «Տաքսի ծառայություն» անվանակարգի ներմուծումը պայմանավորված է նրանով, որ մեր երկրում գործում են բազմաթիվ տաքսի ծառայություններ, սակայն, դա ոչ մի կերպ չի ազդում տվյալ ծառայության որակի բարձրացման վրա: Մենք փորձել ենք մեր կողմից աջակցել այդ ոլորտի զարգացմանը», - ավելացրեց Միրզոյանը:
Նրա խոսքով, ավանդաբար մրցանակաբաշխությունն անցկացվում էր հոկտեմբերին, իսկ նոյեմբերին ամփոփվում էին առցանց քվեարկության արդյունքները, սակայն այս տարի, որոշ հանգամանքներից ելնելով, մրցանակաբաշխությունը տեղափոխվել է նոյեմբեր:
«Ամփոփիչ մամուլի ասուլիսի ժամանակ մենք մրցանակների խաղարկություն կանցկացնենք քվեարկության մասնակիցների համար, որին կկարողանան մասնակցել մինչև նոյեմբերի 30-ը լրացրած և ուղարկած բոլոր հայտերն ունեցողները», - նշեց Միրզոյանը:
Իր հերթին «Armenian Brands» նախագծի ղեկավար Մարիաննա Քաբաբյանն ավելացրեց, որ մրցանակաբաշխությունն ուղղված է հայրենական արտադրության զարգացմանը` վեր հանելով այս կամ այն ոլորտի որակյալ արտադրանքը, հետևաբար` նպաստելով երկրում տնտեսության զարգացմանը:
«Մենք կարծում ենք, որ տեղական ընկերությունների արտադրանքը, թե որակի, թե մատչելիության տեսանկյունից չի զիջում ներկրվող ապրանքներին», - ընդգծեց Քաբաբյանը:
«Ժողովրդական ապրանքանիշ №1 Հայաստանում» մրցանակաբաշխությունը, որը ստանում են դափնեկիր ընկերությունները ապրանքների և ծառայությունների որակի ինքնատիպ նշան է` հիմնված ժողովրդի վստահության վրա: «Ժողովրդական ապրանքանիշ» տիտղոսի շնորհումը թույլ է տալիս ձեռնարկություններին հիրավի համարվել լավագույնը սպառողների կողմից և օգտագործել մրցանակաբաշխության խորհրդանիշը իրենց արտադրանքի փոթեթավորման վրա:
Մրցանակաբաշխության կազմակերպիչներն են` «Տաշիր» ընկերությունների խումբը, «Սպառողների աջակցության կենտրոն» ՀԿ-ն և «Armenian Brands» նախագիծը: -0-
