ԵՐԵՎԱՆ, 6 փետրվարի. /Նովոստի-Արմենիա/. «Ժառանգություն» ընդդիմադիր խմբակցության ղեկավար Զարուհի Փոստանջյանը երկուշաբթի խորհրդարանի նիստում առաջարկեց խորհրդարան հրավիրել թուրքական խորհրդարանի հայազգի պատգամավոր Գարո Փայլանին։
Նշելով, որ 5–րդ գումարման հայկական խորհրդարանը շուտով կավարտի իր աշխատանքը` Փոստանջյանն անհրաժեշտ համարեց հրավիրել Փայլանին ելույթ ունենալու Հայաստանի Ազգային ժողովի ամբիոնից։
10 տարի առանց Հրանտ Դինքի>>
Քրդամետ Ժողովրդա–դեմոկրատական կուսակցության պատգամավոր Գարո Փայլանը հայտնի է հայամետ համարձակ ելույթներով Թուրքիայի մեջլիսում, ինչի համար բազմաիցս ենթարկվել է ճնշման և պատժամիջոցների։ Մասնավորապես, 2016 թվականի ապրիլին Օսմանյան կայսրությունում Հայոց ցեղասխանության հերթական տարելիցի կապակցությամբ Փայլանը թուրքական մեջլիսի նիստում պահանջել է քննություն կատարել Հայոց ցեղասպանության ժամանակ հայ մտավորականության մի շարք հայտնի ներկայացուցիչների սպանության առթիվ։
«Անհրաժեշտ է նրան հնարավորություն տալ ելույթ ունենալ հայ խորհրդարանականների առջև։ Դրանով իսկ մենք կհայտնենք նրան մեր աջակցությունը նրա համար, որ նա բարձրաձայնում է Հայաստանի հետ կապված հարցերը թուրքական խորհրդարանում, ինչի համար ենթարկվում է ճնշման։ Մենք պետք է մեր օժանդակությունը հայտնենք նրան` հրավիրելով Հայաստան»,– ասաց Փոստանջյանը։
Գարո Փայլանը Թուրքիայի խորհրդարանի ամբիոնից հայերենով շնորհավորել է Սուրբ Ծնունդը (ՏԵՍԱՆՅՈւԹ)>>
Նա ընդգծեց, որ, անկասկած, նման առաջարկը քաղաքական ենթատեքստ է պարունակում և պահանջեց սատարել այդ նախաձեռնությանը։
Հայաստանի Ազգային ժողովի խոսնակ Գալուստ Սահակյանն իր հերթին նշեց, որ տվյալ նախաձեռնությունը հարկ է քննարկել։
«Անհրաժեշտ է վերլուծել, թե դա ինչ կտա մեզ, թե ինչ ենք դրանով ուզում ասել։ Ընդհանուր առմամբ, գաղափարը շատ լավն է, բայց միաժամանակ այստեղ առկա է քաղաքական ենթատեքստ, որը պետք է քննարկել»,– ասաց Սահակյանը։ --0--
