ԵՐԵՎԱՆ, 10 հունիսի. /Նովոստի-Արմենիա/. ՌԴ ԱԳՆ պաշտոնական ներկայացուցիչ Մարիա Զախարովային Գարեգին Նժդեհի մասին, հավանաբար, ամբողջական տեղեկություն չեն տրամադրել, «Նովոստի-Արմենիա» գործակալությանն ասաց Հայաստանի Ազգային ժողովի փոխխոսնակ Էդուարդ Շարմազանովը։
Այս կապակցությամբ, Շարմազանովի խոսքով, ինքը ստիպված է պարզաբանումներ տալ հայ ժողովրդի ազգային հերոս Գարեգին Նժդեհի վերաբերյալ։
Ավելի վաղ Զախարովան, մեկնաբանելով Երևանում Գարեգին Նժդեհի արձանի տեղադրումը, ում ճեպազրույցում ներկայացրել էին որպես Վերմախտի «Հայկական լեգիոնի» ստեղծողներից մեկը, ասել էր հետևյալը. «Մեզ համար հասկանալի չէ այս արձանի տեղադրումը, չէ՞ որ մենք բոլորս գիտենք հայ ժողովրդի սխրանքի, Հայրենական մեծ պատերազմում, Երկրորդ աշխարհամարտում հայ ժողովրդի այդ անմահ սխրանքի մասին»։
Ռուսաստանը զարմացած է Երևանում Գարեգին Նժդեհի արձանի տեղադրման փաստից>>
Շարմազանովի խոսքով, Նժդեհը նույնպիսի ազգային հերոս է, ինչպիսին Ալեքսանդր Նևսկին է, գեներալիսիմուս Ալեքսանդր Սուվորովը կամ մարշալ Ժուկովը ռուս ժողովրդի համար։
«Կապել Գարեգին Նժդեհի անունը Վերմախտի հետ սխալ է։ Իր ողջ կյանքը նա նվիրել է հայ ժողովրդի ազատությանն ու անկախությանը, պայքարել է հանուն Հայաստանի, իսկական հայրենասեր է եղել»,- ասաց Շարմազանովը։
Փոխխոսնակն ընդգծել է, որ Նժդեհը երբեք հակառուսական չի եղել։ Ավելին, Առաջին համաշխարհային պատերազմի տարիներին պատերազմել է Թուրքիայի դեմ ռուսական կանոնավոր բանակի կազմում՝ ղեկավարելով հայ կամավորական ջոկատները և արժանացել է պատվի Ռուսական կայսրության կողմից։
«Եվս մեկ կարևոր փաստ. 1939 թվականի օգոստոսի 23-ին Մոլոտովը ֆաշիստական Գերմանիայի արտաքին գործերի նախարար Ռիբենտրոպի հետ պակտ է ստորագրել, բայց ոչ ոք չի մեղադրում Մոլոտովին և ԽՍՀՄ-ին հիտլերյան Գերմանիայի հետ դաշնակցության մեջ։ Բոլորն էլ հասկանում են, որ դա արվել է Խորհրդային Միության ժողովուրդների շահերից՝ հնարավոր ֆաշիստական հարձակումը կանխելու համար»,- նշեց փոխխոսնակը։
Նա ընդգծեց, որ նույն տրամաբանությամբ էլ Նժդեհը կապ է պահպանել գերմանացիների հետ, որ կասեցնի Գերմանիայի դաշնակից Թուրքիայի հարձակումը Հայաստանի վրա։
«Նժդեհի ոչ մի զինվոր Երկրորդ համաշխարհային պատերազմի տարիներին չի պատերազմել Խորհրդային Միության դեմ»,- ասաց Շարմազանովը։
Գարեգին Նժդեհի «ցեղակրոն» ուսմունքը ենթադրում է, որ յուրաքանչյուր հայի համար բարձրագույն արժեք պետք է լինի սեփական ծագումը, ընտանիքն ու ավանդույթները։ Ցեղակրոնի գլխավոր նպատակն է համախմբել հայ ժողովրդին պատմական հայրենիքի ողջ տարածքում` միասնական պետության շրջանակում։ Նժդեհի գաղափարները ՀՀ նախագահ Սերժ Սարգսյանի գլխավորած ՀՀԿ–ի գաղափարախոսական պլատֆորմի հիմքն են։-0-
