ԵՐԵՎԱՆ, 14 ապրիլի./Նովոստի-Արմենիա/. Այս գիշեր՝ ժամը 01:25-ի սահմաններում, կրակոց է հնչել դերասան Հովհաննես Ազոյանի բնակարանի պատուհանի ուղղությամբ, հաղորդում է armtimes.com-ը:
Загружается новость ... "Лево"
«Հայկական ժամանակ»-ի հետ զրույցում Ազոյանը պատմել է, որ կրակոցի ձայնը չեն լսել, լսել են պատուհանի կոտրվելու ձայնը, երբ հայտնաբերել են, որ պատուհանը ծակ է, ահազանգել են ոստիկանություն: Ազոյանի խոսքով՝ հնչել է մեկ կրակոց, վնասվել է միայն պատուհանը, տուժածներ, բարեբախտաբար, չկան:
«Դեպքի պահին դերասանը տանն է եղել իր ծնողների հետ, հարեւանները որեւէ բան լսել են, թե ոչ, դժվարացավ ասել, նշեց՝ քննությունը կպարզի»,- գրում է աղբյուրը:
«Ահազանգել եմ ոստիկանություն, արդեն բացատրություն եմ տվել, տեղում զննել են, գործողությունները կատարվել են, պարզապես պետք է ասեմ, որ ոստիկանները եկել են առանց որևէ դիմակի, առանց սոցիալական հեռավորություն պահելու, այսինքն՝ կորոնավիրուս Հայաստանում չկա, թող պարետն էլ իմանա, որ ոստիկանությունն աշխատում է առանց ձեռնոցի, առանց դիմակի, մինչդեռ տանը կան մեծահասակ ծնողներ»,- նշել է դերասանը:
Թերթի հարցին՝ կրակոցը որևէ բանի հետ կապո՞ւմ է, որևէ մեկին կասկածո՞ւմ է, Ազոյանը պատասխանել է, որ կասկածներ չունի որևէ մեկի նկատմամբ:
ՀՀ ոստիկանության հասարակայնության հետ կապի և լրատվության վարչության պետի տեղակալ Էդգար Ջանոյանը «Նովոստի-Արմենիա» գործակալության հետ զրույցում հաստատել է, որ Օրբելի փողոցում գտնվող Հովհաննես Ազոյանի տան ուղղությամբ կրակոց է հնչել:
Դեպքի առթիվ ոստիկանությունում նախապատրաստվում են նյութեր:-0-