ԵՐԵՎԱՆ, 29 հունվարի./Նովոստի–Արմենիա/. Նախօրեին ողբերգություն է տեղի ունեցել Արագածոտնի մարզի Արայի լեռան վրա։
Լեռան վրա ձնաբուք է սկսվել, և ձյան մեծ զանգված սահել է ցած` իր հետ տանելով նաև արշավականներին։ Ձյան անկման հետևանքով մահացել է արշավական Նաիրուհի Սիմոնյանը։
Այս մասին հայտնել է Ալպինիզմի և լեռնային տուրիզմի հայկական Ֆեդերացիայի նախագահ Սուրեն Դանիելյանը Facebook-ի իր էջում։
«Նախապես ներողություն խնդրելով դեպքի վայրից երեկվա մեր հարկադրված լռության և ձեր մեկնաբանություններին չպատասխանելու համար, ցավով տեղեկացնում ենք, երեկ՝ հունվարի 28-ին, Էդգար Նավասարդյանի արշավական խմբի մի մասը Արա լեռան վրա տեղի ունեցած ձյան անկման հետևանքով հայտնվեց ծանր իրավիճակում՝ ձյան հետ սահելով լանջից ցած։ Ցավով արձանագրեցինք, որ խմբի արշավական մի աղջիկ՝ Նաիրուհի Սիմոնյանը, ըստ մեր կարծիքի, անկման հետևանքով ստացել էր կյանքի համար անհամատեղելի վնասվածքներ և մահացել, ինչի համար խոր ցավ ենք ապրում, և ընտանիքի անդամներին, հարազատներին հայտնում ենք մեր ցավակցություններն ու կարեկցանքը»,– մասնավորապես գրել է նա։
Դանիելյանի հաղորդմամբ, դեպքից անմիջապես հետո խմբի անդամները ահազանգել են Ֆեդերացիա և ԱԻն։
Նախքան փրկարար ուժերի տեղ հասնելը արշավական խմբի անդամներն իրենց ուժերով օգնություն են ցուցաբերել։ Օգնության է եկել նաև սրտացավ լեռնագնացների մի մեծ խումբ, ինչպես նաև Երևանի հատուկ նշանակության փրկարարական խումբը։
«2 ժամ տևողությամբ համատեղ փրկարարական աշխատանքների արդյունքում Էդգար Նավասարդյանին իջեցրեցինք ցած։ Պատահարի արդյունքում ոտքը կոտրվել է մի քանի տեղից և ցրտահարվել է»,– ավելացրել է Դանիելյանը։
Այժմ Նավասարդյանը գտնվում է վերակենդանացման բաժանմունքում։
Загружается новость ...
"Право"
Ֆեյսբուքի հայկական տիրույթում օգտատերերը փորձում են օգնության ձեռք մեկնել` վիրավորին որևէ աջակցություն ցուցաբերելու նպատակով։ Մասնավորապես, օգտատեր Ահարոն Խաչատրյանը գրառում է հրապարակել իր
էջում` հայտարարելով դրամահավաքի մեկնարկի մասին։
«Էդգարին հարկավոր է շտապ վիրահատություն, որը մեծ ֆինանսական ծախսերի հետ է կապված: Իսկ այսօրվա Հայաստանում, հասկանում ենք, որ միջին վիճակագրական ընտանիքը պատրաստ չէ նման ծախսերի՝ նման սեղմ ժամկետներում»,– գրել է նա։
Հանգանակված գումարը, ինչպես գրել է Խաչատրյանը, ուղղվելու է Էդգարի կյանքն ու առողջությունը փրկելուն և Նաիրուհու ընտանիքին ֆինանսական աջակցություն ցուցաբերելուն։ -0-
