ԵՐԵՎԱՆ, 4 մարտի. /Նովոստի-Արմենիա/. Երևանում անցկացվել է բողոքի ակցիա Խորենացի փողոցում Կրթության և գիտության նախարարության նախկին շենքի ճակատի քանդման դեմ։
Ակցիայի մասնակիցներն անցել են կենտրոնական փողոցներով «Վանդալիզմ» պաստառներով, իսկ քանդված շենքի մոտ թողել են «Սուպերմամա, տգեղ է» գրառումներով պոստերներ` ակնարկելով քաղաքապետ Հայկ Մարությանի առնչությունը շենքի քանդման աշխատանքներին։
«Արթուր Մեսչյանն էլ պետք է հասկանա`որքան էլ վաղը կամ մյուս օրը հավաստիացնի, որ նրան ստիպել են դա անել, միևնույն է` փաստարկը չի ընդունվի։ Այդ շենքը մշակութային ժառանգության նմուշ է»,– ասաց ակտիվիստ, «Քաղաքացիական գիտակցություն» հասարակական կազմակերպության ղեկավար Նարեկ Սամսոնյանը։
Նրա խոսքով, շենքը կարելի էր պահպանել և վերականգնել, ոչ թե քանդել։ Սամսոնյանը խոստացավ, որ «քաղաքապետին հանգիստ կյանք չեն տալու»։
Քաղաքապետարանի հայտարարությունը
«Խորենացի 13 հասցեում գտնվող շենքն ապամոնտաժվել է դեռևս 2004 թվականին` միայն ճակատի պահպանմամբ։ Ի սկզբանե, 2004 թվականին շենքի սեփականաշնորհումից հետո սեփականատերերը չեն նախատեսել ճակատային մասի պահպանում։ Շինությունը չի ունեցել հուշարձանի կարգավիճակ, ինչպես նաև չի ներառվել քաղաքապետարանի ցուցակում որպես ճարտարապետական արժեք ներկայացնող շինություն»,– ասվում է Երևանի քաղաքապետարանի Facebook–ի էջում փետրվարի 27–ին հրապարակած գրառման մեջ։
Նշվում է, որ 2017թ. հողամասը ձեռք է բերել «Արմսվիս Փրոփերտիս» ՓԲԸ-ն, որը դիմել է Երևանի քաղաքապետարան՝ շենքի կիսաքանդ ճակատային հատվածը ապամոնտաժելու և տեղում ստորգետնյա հարկերով բիզնես կենտրոն կառուցելու նպատակով: Ներկա պահին ապամոնտաժման աշխատանքներն իրականացվում են համաձայն նախագծի և 08.02.2019թ.-ին տրամադրված քանդման թույլտվության հիման վրա:
«Ի դեպ, ընկերության կողմից ներկայացված բիզնես կենտրոնի կառուցման էսքիզային առաջարկով խնդրո առարկա ճակատը նոր մոտեցմամբ վերականգնվելու է՝ դառնալով համալիրի ինտերիերի բաղկացուցիչ մասը: Հարկ է նշել, որ տասնյակ տարիների ընթացքում տեղումների հետևանքով շենքի ճակատային հատվածը խարխլվել է»,– ասվում էր հրապարակման մեջ։
Մոռացված խոստումնե՞ր
Երևանի գլխավոր ճարտարապետի պաշտոնում տված առաջին մամուլի ասուլիսում Մեսչյանը խոստացել էր, որ քանի դեռ ինքն այդ պաշտոնում է, չի ապամոնտաժվելու և ոչ մի պատմական հուշարձան։ Դրա փոխարեն նա խոստացավ ամրացման և վերականգնման աշխատանքներ։
Մեսչյանի խոսքով, շինարարությամբ զբաղվող կապալառուները պետք է միջոցներ հատկացնեն պատմական հուշարձանների վերականգնմանը։ -0-