ԵՐԵՎԱՆ, 12 հոկտեմբերի. /Նովոստի–Արմենիա/.
The Huntr անկախ պորտալը հրապարակել է Երևանի ուղեցույցը։
«Հայաստանի գեղեցկությունն առաջին անգամ ցնցում է հենց ինքնաթիռի պատուհանից։ Երկրորդ անգամ դուք ցնցվում եք օդանավակայանից դուրս գալիս։ Թվում է, թե ձեր առջև պատմության գրքի էջեր են բացվում, որը դուք ընթերցել եք դպրոցում։ Գրքում նշվում է, որ աշխարհում չկա այլ ազգ, որն ունի այսքան հին, բարդ և ողբերգական պատմություն», – գրում է հոդվածի հեղինակը։
Նշվում է, որ Հայաստանով ճամփորդելիս կարելի է պատկերացում կազմել խորհրդայի դարաշրջանի մասին։
«Զբոսնելով քաղաքի կենտրոնում և զմայլվելով ճարտարապետական հուշարձաններով, թանգարաններով, սրճարաններով` ձեզ համակում է կարոտախտի անբացատրելի մի զգացում», – գրում է հոդվածի հեղինակը։
Հոդվածում նաև նշվում է, որ Երևանում կյանքը «եռում է»։
«Անպայման այցելեք Օպերայի թատրոն կամ պարզապես զբոսնեք այդ տարածքում և ծանոթացեք ճարտարապետությանը։ «Վարդագույն քաղաք» այցելությունը լիարժեք չէր լինի առանց Հանրապետության Հրապարակի։ Հսկա օղակաձև հրապարակում դուք կնկատեք, թե ինչպես են մարդիկ հավաքվում «երգող» շատրվանների շուրջ», – նշում է հոդվածի հեղինակը։
Նրա ուշադրություն չեն վրիպել նաև երկրի գաստրոնոմիկ ձեռքբերումները։
«Օրը լավագույնս սկսելու համար կարելի է համտեսել հայկական թխվացքեղենը, թարմ միրգն ու հայկական սուրճը։ Քաղաքում կան բազմաթիվ ռեստորաններ։ Եթե դուք որոշել եք ինքներդ ուտեստ պատրաստել, ապա Երևանում միշտ կգտնեք թարմ միս, միրգ ու բանջարեղեն», – գրում է The Huntr–ը։
Հեղինակը նաև ուշադրություն է դարձրել բուռն գիշերային կյանքին։
«Փաբերի փողոցը գտնվում է Ազատության հրապարակի մոտակայքում, և հայերը կարող են խմել ու երգել ողջ գիշեր, այնպես որ պատրաստեք հարմարավետ կոշիկներ և պատրաստվեք պարել տարբեր ոճի երաժշտության ներքո», – նշում է նա։
The Huntr–ն անդրադարձել է նաև հայկական պուրակներին և այնտեղ տիրող հանգիստ մթնոլորտին։
«Կյանքը մեծ քաղաքում կարող է երբեմն լարված լինել, այցելեք Թումանյանի այգի և նայեք քաղաքին այլ տեսադաշտից։ Հանգստյան օրերին զբոսայգիները լի են զբոսաշրջիկներով և տեղացիներով», – նշում է հրատարակությունը։
Եվ իհարկե Երևան այցելելիս անհնար է ուշադրություն չդարձնել հայտնի «Վերնիսաժին»։
«Անհնար է լինել Երևանում և չայցելել «Վերնիսաժ», բաց շուկաներ, որտեղ կարելի է ձեռք բերել հին իրեր, գորգեր, կտավներ, հուշանվերներ, ձեռագործ պայուսակներ և հագուստ, հին տեսախցիկներ և անգամ զինվորական հանդերձանք։ Իսկ կարևորն այն է, որ կարելի է սակարկել», – նշում է հոդվածի հեղինակը։–0–
