ԵՐԵՎԱՆ, 28 մայիսի. /Նովոստի-Արմենիա/. Վերջին 1,5-2 տարիներին տեղեկատվական անվտանգության մակարդակի բարելավման հարցում դրական միտում է նկատվել, սակայն իրավիճակը դեռևս մնում է անբավարար մակարդակում, շաբաթ ասել է մեդիափորձագետ Սամվել Մարտիրոսյանը:
Նա պարզաբանել է, որ կիբեռանվտանգության ապահովման բարդությունը սպառնալիքների մշտական մուտացիաներն են և հասարակության ու պետության` դրանց օպերատիվորեն արձագանքելու ընդունակ չլինելը:
Համակարգիչները հնարավոր կլինի կառավարել մտքի ուժով>>
«Տեղեկատվական սպառնալիքների արձագանքման արագությունը ոչ միայն Հայաստանի, այլ նաև ամբողջ աշխարհի խնդիրն է»,- ասել է նա:
Փորձագետը նշել է նաև, որ այդ բնագավառում դրական տեղաշարժեր կան:
«Տեղեկատվական անվտանգության իրավիճակը բարելավելու ուղղությամբ քայլեր են ձեռնարկվում, հանրությունն ինքնակրթվում է: Աճում է շուկան` դեռևս մի քանի տարի առաջ Հայաստանում չկային տեղեկատվական անվտանգության լոկալ ընկերություններ: Եվ, վերջապես, պետությունը սկսել է մասնակցել, մասնագետների հավաքագրում է սկսվել, մշակվում է կիբեռանվտանգության հայեցակարգ»,- ասել է նա: -0-
