Սուրենյանը խոստացել է ուրախացնել Հայաստանի բնակիչներին

ԵՐԵՎԱՆ, 11 օգոստոսի. /Նովոստի-Արմենիա/. ՀՀ ԱԻՆ հիդրոմետ ծառայության օդերևութաբանության կենտրոնի պետ Գագիկ Սուրենյանը հերթական գրառումն է կատարել Facebook-ում:

«Առավոտյան մենք ուսումնասիրությունները կվերջացնենք և ձեզ շատ լավ լուր կհայտնենք»,- գրել է նա իր էջում:

Հայհիդրոմետկենտրոնը նույնպես որոշակի հույսեր է տալիս` օդերևութաբանները խոստանում են ջերմաստիճանի նվազում 1-2 աստիճանով:


Սակայն օգոստոսի 11-15-ը հանրապետությունում սպասվում է բարձր ջերմային ֆոն, Արարատյան դաշտավայրում և Սյունիքի ցածրադիր հատվածներում ցերեկային ժամերին կանխատեսվում է 38-39 աստիճան տաքություն և հրդեհավտանգ բարձր մակարդակ:
Այդ օրերին ցերեկային միջին ջերմաստիճանը 4-5 աստիճանով բարձր կլինի նորմայից:

Միաժամանակ, ուլտրամանուշակագույն ճառագայթման ինդեքսը հանրապետությունում օգոստոսի 11-ին կկազմի 7, ժամը 11:00-ից 15:00 խորհուրդ է տրվում խուսափել արևի ուղիղ ճառագայթներից:

«Երկարատև ֆիզիկական աշխատանքն արևի տակ կարող է դառնալ արևահարության պատճառ»,- հիշեցնում են օդերևութաբանները: -0-