ՍՇՎ-ների ակտիվացումը Հայաստանում. եղել են դեպքեր, երբ երեխաներին հիվանդանոցների միջանցքներում են բուժել (ՎԻԴԵՈ)

ԵՐԵՎԱՆ, 18 մարտի. /Նովոստի-Արմենիա/. Հայաստանում, հատկապես` մայրաքաղաքում, սուր շնչառական վարակները հաճախակի են դարձել:

Ընդ որում, հիվանդության աճ արձանագրվել է հատկապես մանկահասակ երեխաների շրջանում, ինչի հետևանքով Երևանի մանկական հիվանդանոցները գերծանրաբեռնված են, գրում է armlur.am-ը:

Ինչպես հայտնում է պարբերականը, վերջին օրերին անգամ հիվանդանոցներ են եղել, որտեղ նման ախտանիշներով մանկահասակ երեխաներին միջանցքներում են բուժել:


Երիտասարդ մայրերը պատմել են աղբյուրին, որ սուր շնչառական վարակների ակտիվացման պատճառով իրենք իրենց երեխաներին չեն ուղարկում մանկապարտեզներ:

Սուրբ Գրիգոր Լուսավորիչի անվան բժշկական կենտրոնի մանկական բաժանմունքի վարիչ Անուշ Հակոբյանը «Ժողովուրդ» թերթի թղթակցին պատմել է, որ հիվանդների վիճակը գնահատվում է թեթև և միջին ծանրության` առողջացման դրական շարժով:

«Հատկապես այս պահին մեզ մոտ բավականին թեթևացավ, վերջին 2-3 օրվա ընթացքում ահագին դուրսգրումներ եղան: Կասեմ, որ կա որոշ թեթևացում նաև դիմելիության առումով: Այս պահին միջին ծանրաբեռնվածություն է: Ոչ միայն սուր շնչառական վարակներ ունենք, այլ նաև տոնզիլիտներ, այսպես ասած` անգինա, ջերմող երեխաներ, թոքաբորբով, ստամոքսաղիքային երևույթներով, ալերգիաներով, միզուղիների վարակով և այլն»,- ասել է մասնագետը: -0-

Տեսանյութը` armlur.am-ի