Սննդամթերքի անվտանգության պետական ծառայության գործունեությունը կուսումնասիրվի

ԵՐԵՎԱՆ, 29 սեպտեմբերի. /Նովոստի-Արմենիա/. ՀՀ վարչապետ Կարեն Կարապետյանը հինգշաբթի կառավարության նիստի ժամանակ Գյուղատնտեսության նախարար Իգնատի Առաքելյանին հանձնարարել է ուսումնասիրել Սննդամթերքի անվտանգության պետական ծառայության գործունեությունը:

Վարչապետը նշել է, որ վերջին օրերին ձեռնարկատերերի և սպառողների իրավունքների պաշտպանության ներկայացուցիչների հետ անցկացված հանդիպումների ժամանակ ներկայացվել էին հարցեր և խնդիրներ` կապված ՍԱՊԾ-ի ծառայությունների հետ:

«Հաշվի առնելով դժգոհությունները և ոլորտի ներկայացված խնդիրները` հանձնարարում եմ ուսումնասիրել խնդիրը, ինչպես նաև պարզել, թե որքանով լաբորատորիան պետք է գտնվի Ծառայության ղեկավարության ենթակայության ներքո, թե լինել անկախ, և առաջարկներ ներկայացնել այս հարցի շուրջ», - ասաց Կարապետյանը:

ԶԼՄ-ների հրապարակումների համաձայն, ներկրվող և արտահանվող ապրանքների մաքսային ձևակերպման ժամանակ տեղեկանքների տրամադրման ընթացքում Ծառայության տեսուչները, ղեկավարվելով «վերևից եկող հրահանգներով», նպաստում էին կամ խոչընդոտում որոշ սուբյեկտների բիզնես գործընթացներին, ինչը հատկապես կարևոր է արագ փչացող ապրանքների պարագայում: -0-