ԵՐԵՎԱՆ, 30 հունվարի. /Նովոստի-Արմենիա/. ՌԴ ֆինանսների նախկին նախարար Ալեքսեյ Կուդրինը կարծում է, որ բանակը պայմանագրային դարձնելու մասին ՌԴ նախագահի թեկնածու Միխայիլ Պրոխորովի առաջարկն ավելի իրակատեսական է իրականացնել ոչ թե 2015, այլ 2017 թ.-ին՝ այլ ոլորտների ծախսերը կրճատելու պայմանով:
Իր նախընտրական ծրագրում Պրոխորովը խոստանում է 2015 թ.-ից չեղյալ հայտարարել ՌԴ քաղաքացիների զորակոչը՝ դարձնելով բանակը պայմանագրային և երկրի Զինված ուժերը դարձնելով ազգային տնտեսության էական ոլորտ, հաղորդում է «ՌԻԱ Նովոստին»:
«Շատ դժվար է 2015 թ.-ից բանակը դարձնել պայմանագրային: Ավելի իրատեսական է այն դարձնել 2017 թ.-ից՝ թվի նվազեցման և այլ ծրագրերի կրճատման դեպքում», - երկուշաբթի գրել է Կուդրինը Twitter-ի իր միկրոբլոգում՝ պատասխանելով Պրոխորովի ծրագրի իրատեսության մասին հարցին:
«Ես աջակցում եմ բանակը պայմանագրային դարձնելու գաղափարին: Բացի փողից, պահանջվում է նաև ղեկավարման, տեղակայման փոփոխություն և կադրերի պատրաստում», - ավելացրել է նա:
ՌԴ նախագահ Դմիտրի Մեդվեդևը սեպտեմբերի 26-ին հրամանագիր է ստորագրել փոխվարչապետի պաշտոնից Կուդրինի հրաժարականի մասին, որի պատճառը նախագահի և Կուդրինի միջև ծագած տարաձայնություններն էին առաջին հերթին ռազմական նպատակների համար նախատեսված ծախսերի հարցում: -0-
