ԵՐԵՎԱՆ, 18 նոյեմբերի. /Նովոստի-Արմենիա/. Եվրոպական և ասիական մեդիաների վեցերորդ ֆորումը (ԵԱՄՖ), որը կանցկացվի Աստանայում նոյեմբերի 21-22-ը, կդառնա ամենաներկայացուցչական «նոր տիպի ֆորումը», որի ընթացքում մասնակիցներն ինտերակտիվ ձևաչափում կզրուցեն սոցիալական ցանցերի մասին, կքննարկեն ինտերնետում պետական կարգավորման խնդիրներն ու կմասնակցեն Նիկիտա Միխալկովի վավերագրական ֆիլմի պրեմիերային, պատմել են միջոցառման կազմակերպիչները:
Ֆորումին կմասնակցեն ԱՊՀ, Բալթյան երկրների և Վրաստանի ԶԼՄ-ների ավելի քան 250 ներկայացուցիչներ, այդ թվում՝ ԶԼՄ-ների ղեկավարներ և հետխորհրդային տարածքի մեդիաարդյունաբերության ականավոր թոփ մենեջերներ, բլոգերներ, փորձագետներ, վերլուծաբաններ:
«Սա արդեն «ՌԻԱ Նովոստիի» կազմակերպած վեցերորդ ֆորումն է, և հնարավոր է, որ այն ամենամեծն ու ներկայացուցչականն է: Այս տարի մենք ավելի քան 250 հյուր ենք ակնկալում, որոնց թվում են լրագրողներ, նախկին ԽՍՀՄ բոլոր պետությունների ԶԼՄ-ների ղեկավարներ ու գլխավոր խմբագիրներ: Մենք փորձել ենք փոքր-ինչ ոչ ավանդական դարձնել այս ֆորումը», - ասել է «ՌԻԱ Նովոստիի» գլխավոր խմբագրի տեղակալ Օլեգ Անանևը «ԵԱՄՖ. անկախության 20 տարին. ԶԼՄ-ներն ու հասարակությունը» թեմայով Մոսկվա-Աստանա տեսակոնֆերանսի ընթացքում:
«ՌԻԱ Նովոստիի» Լուրերի միավորված խմբագրության ղեկավարի տեղակալ Ալեքսանդր Կուպրիանովն իր հերթին նշել է, որ կազմակերպիչները 2011 թ.-ին նախատեսում են ԵԱՄՖ-ն դարձնել «հարթակ, որտեղ մենք կկարողանանք քննարկել տեխնոլոգիական մարտահրավերները, որոնք այժմ կանգնած են ԶԼՄ-ների ոլորտի առջև Ռուսաստանում, ԱՊՀ, Բալթյան երկրներում և Վրաստանում»:
«Մուլդիմեդիոն տեխնոլոգիաները, սոցիալական ցանցերն այս ֆորումի շրջանակներում կդառնան բանավեճերի ամենակարևոր ուղղություններից մեկը: Մենք կքննարկենք նոր մեդիահարթակները, ժամանակակից մեդիայի նոր տնտեսությունը, ինտերնետում պետական կարգավորման խնդիրները: Ինձ թվում է, որ հետաքրքիր և խաղային ձևաչափում մենք կզրուցենք սոցիալական ցանցերի և դրանց հետևանքների մասին», - պատմել է Կուպրիանովը:
Ֆորումի մասնակիցներին նորովի մտածելու, ժամանակակից տեխնոլոգիաների աչքերով աշխարհին նայելու ազդակ հաղորդելու նպատակով կազմակերպիչներն ակտիվ աշխատանք կառաջարկեն Twitter-ի միկրոբլոգինգի համակարգում:
«ՌԻԱ Նովոստիի» տարածաշրջանային նախագծերի և ենթակառուցվածքների տնօրինության ԱՊՀ, Բալթյան երկրների և Ուկրաինայի խմբագրության ղեկավարի տեղակալ Զախար Վինոգրադովն ընդգծել է, որ ֆորումին արդեն ավելի քան 130 մարդ է հավատարմագրվել:
«Ուրախ ենք նշել, որ այս ֆորումը նոր տիպի է լիելում, դա նաև նման միջոցառումներ անցկացնելիս նոր տեխնոլոգիաների օգտագործում է նախատեսում: Մենք նաև կփորձենք շոշափել շփման նոր ձևեր», - ասել է նա:
Որպես հատուկ հյուր Աստանայում կայանալիք Ֆորումին հրավիրված է կինոռեժիսոր Նիկիտա Միխալկովը:
Կազմակերպիչները մեծ հույսեր են կապում «Պատը պատին» բանավեճին ԵԱՄՖ-ի պատվիրակների ակտիվ մասնակցության հետ, որը կանցկացնի հայտնի հեռուստալրագրող Սվետլանա Սորոկինան:
«Այս բանավեճի շրջանակներում մենք առաջարկում ենք սոցիալական ցանցերի միջոցով քվեարկություն անցկացնել սոցիալական ցանցերի խնդրի կապակցությամբ: Մեզ համար շատ հետաքրքիր է ծանոթանալ գործընկերների կարծիքի հետ այն մասին, թե ինչ է տեղի ունենում ինտերնետում», - ավելացրել է նա:
«ՌԻԱ Նովոստին» 2006 թ.-ից կանոնավոր կերպով ազգային մեդիաների ֆորումներ է անցկացնում հետխորհրդային տարածքում: 2009 թ.-ին այդ ֆորումները ստացան ԵԱՄՖ անվանումը, որոնց շրջանակներում Ռուսաստանի առաջատար մեդիահոլդինգն առաջարկել է նախկին ԽՍՀՄ հանրապետությունների լրագրողական հանրությանը տեղեկատվական գործընկերության նոր ձևաչափ` արդյունավետ հարթակ տրամադրելով բաց երկխոսության, նորարարությունների քննարկման համար: Բոլոր ԶԼՄ-ները նշում են այդ միջոցառումների դրական արդյունքները:-0-
